O aeroporto de Santiago perde case un 13% do seu tráfico antes do ‘hachazo’ de Ryanair

Unha de cal e outra de area para os aeroportos galegos nestes oito primeiros meses de 2025. As tres terminais acolleron a un total de 3,8 millóns de pasaxeiros no que vai de ano, dos cales algo máis da metade (2,2 millóns) correspóndense cunha terminal de Santiago que xa albiscan no horizonte os novos plans de recorte de Ryanair.

O aeroporto de Santiago-Rosalía de Castro, rexistrou un total de 346.012 pasaxeiros en agosto, o que representa un descenso do 10% respecto ao mesmo mes do ano anterior. Con respecto ás mercadorías, o rexistro alcanzou as 262 toneladas. Esta caída tráslase con maior intensidade no dato acumulado do ano, que se sitúa un 12,8% do rexistrado en agosto de 2024.

A terminal compostelá enfróntase así a un escenario marcado polos plans de Ryanair para pechar a súa base, un movemento que suporá a perda dun investimento cercano aos 180 millóns de euros e que pon en xaque a unha aerolínea que move arredor dun cuarto do seu tráfico aéreo. A esta medida, que suporá un tallo de 1,2 millóns de asentos sumarase a cancelación de todos os voos a Vigo a partir de xaneiro de 2026 e Tenerife Norte a partir do inicio do inverno de 2025. Ademais os aeroportos de Valladolid e Xerez permanecerán pechados durante o inverno de 2025.

A situación de Lavacolla, que xa viu como este ano Ryanair suprimía o 28% dos seus voos e retiraba un dos tres avións B737 con base alí, é similar á de Peinador. O aeroporto de Vigo pechou o mes de agosto cun total de 738.110 pasaxeiros acumulados (un 7,8 % máis). No oitavo mes do ano, Peinador rexistrou 1.230 voos (+1,1 %) e 111.611 pasaxeiros (-4,4 %).

Esta dinámica contrasta coa do aeroporto de Alvedro, que pechou o mes de agosto con 107.474 pasaxeiros (un 4,2% máis), o que permite elevar ata as 851.830 persoas o dato acumulado dos oito primeiros meses do ano, o que supón un salto do 4,3% respecto ao mesmo período de 2024.