O galego Santiago Sesto, novo director xeral da Asociación para o Progreso da Dirección (APD)

Acento galego para a Asociación para o Progreso da Dirección (APD). O Consello Reitor da entidade nomeou a Santiago Sesto como novo director xeral.

Sesto, licenciado en Ciencias Políticas e da Administración pola Universidade de Santiago de Compostela e Máster en Dirección e Creación de Empresas pola USC e en Dirección Pública por ESADE Business School, escala así no organigrama. O executivo galego exercía ata agora como subdirector xeral e nesta nova etapa asume a responsabilidade executiva co obxectivo de “consolidar o posicionamento institucional de APD, fortalecer a súa estrutura operativa e dar continuidade ao proxecto estratéxico da asociación”.

“Sesto acumula máis de 25 anos de experiencia en dirección, relacións institucionais e desenvolvemento asociativo. A súa traxectoria inclúe roles de responsabilidade en organizacións empresariais en España, Bruxelas e Latinoamérica, combinando experiencia executiva e visión estratéxica”, destaca a entidade a través dun comunicado.

Sesto releva no cargo a Emma Gómez e emprende así unha nova aventura na súa etapa profesional. Sesto formou parte do equipo de dirección da delegación de CEOE ante a Unión Europea en Bruxelas (1999-2003), onde participou na interlocución con institucións comunitarias e na representación empresarial española. Así mesmo, foi Director da delegación en Bruxelas de ASAJA Galicia (2001), membro do Comité Económico e Social Europeo (CES), membro da Confederación de Empresarios de Galicia (2003) e Director Xerente en ASFHORGAL (2005-2009). Desde 2009, desempeñou distintos roles en APD, primeiro como Director da Zona Noroeste e, desde 2018, como Subdirector Xeral e Director de Operacións a nivel nacional.

“No ano no que APD celebra o seu 70 aniversario, a Asociación reafirma a súa vocación de servizo aos directivos e o seu compromiso co fortalecemento do tecido empresarial e co papel da sociedade civil organizada na modernización económica do noso país, afrontando esta nova etapa cunha estrutura consolidada e unha folla de ruta definida que marcará o futuro da organización”, recalcan desde a APD.