O Supremo rexeita o recurso da Xunta e Norvento contra a paralización cautelar dun parque eólico
Segundo Amil Sen Eólicos, o Alto Tribunal inadmitiu a trámite o recurso de casación contra o auto do TSXG que ordenou a paralización das obras para o parque eólico Acibal.
Comentarios
O Tribunal Supremo acordou inadmitir a trámite o recurso de casación interposto pola Xunta contra o auto do Tribunal Superior de Xustiza de Galicia (TSXG) que ordenou a paralización cautelar das obras do parque eólico Acibal a instancia do colectivo ecoloxista Adega, segundo informa Amil Sen Eólicos.
A inadmisión prodúcese por falta de fundamentación suficiente e ausencia de interese casacional obxectivo, segundo destaca esta asociación nunha nota.
En concreto, a sección primeira da sala do contencioso-administrativo do Supremo, nunha providencia con data do pasado 11 de marzo, considera que a Xunta non xustificou que o caso teña relevancia xeral nin cumpre os requisitos para ser revisado en casación. Deste xeito, mantense a paralización das obras e imponse 1.000 euros en costas á Xunta.
Restos arqueolóxicos
Por outra banda, Amil Sen Eólicos lembra que “o conflito ten a súa orixe na aparición, no transcurso das obras, de numerosos restos arqueolóxicos no Monte Acibal (incluíndo petroglifos e outros elementos de alto valor patrimonial) que non foran debidamente identificados nin avaliados durante a tramitación ambiental e patrimonial do proxecto”.
