O xigante CIE Automotive compra o 100% de Aludec, histórico provedor galego de Stellantis.
CIE Automotive valora en 200 millóns de euros á empresa con sede en Ponte Caldelas, que conta con 1.300 empregados repartidos nunha ducia de plantas produtivas en España, Portugal, México e EEUU.
Vista exterior das instalacións de Aludec en Ponte Caldelas / Páxinas Galegas
Comentarios
Outro provedor da automoción de capital 100% galego cambia de mans. CIE Automotive, empresa que cotiza no Mercado Continuo e que presenta unha capitalización superior aos 3.500 millóns de euros, enviou un comunicado á Comisión Nacional do Mercado de Valores (CNMV) no que informa da compra do 100% de Aludec.
CIE Automotive subliña que o “valor da transacción (enterprise value) ascende a aproximadamente 200 millóns e que “o prezo da operación será abonado en metálico no peche e mediante caixa actualmente dispoñible”.
Mediante este movemento, CIE Automotive fai-se co control de Aludec, empresa con base de operacións en Ponte Caldelas e que conta con arredor de 1.300 empregados. “Aludec conta con 10 plantas produtivas distribuídas en catro países, incluíndo España, Portugal, México e Estados Unidos“, destaca a firma, que revela que as vendas esperadas da empresa galega para este 2025 sitúanse no entorno dos 160 millóns de euros.
“A compañía é un full service supplier de compoñentes decorativos para automoción, especializada na fabricación de pezas de plástico e metal tanto para o interior como para o exterior do vehículo”, recalca CIE Automotive.
A folla de ruta de CIE Automotive
Segundo Jesús María Herrera, conselleiro delegado de CIE Automotive, “a integración de Aludec supón, no contexto da nosa estratexia de diversificación, a creación dunha nova división de compoñentes estéticos (branding). Unha transacción que reforza o noso posicionamento como provedor de referencia para os clientes, ao poder ofrecer esta nova liña de produtos decorativos globalmente”.
Neste sentido, o primeiro executivo de CIE Automotive pon en valor o “excelente posicionamento estratéxico e comercial de Aludec“, así como a súa “excelente rendibilidade”, a súa “sólida posición financeira e, sobre todo, un nivel moi alto de xeración de caixa, en liña co de CIE Automotive“.
Pola súa parte, Vicente Villamarín, presidente de Aludec, expresou “a súa satisfacción ao integrar a compañía nun grupo de ámbito mundial, que sen dúbida asegura o crecemento dentro do sector e permite continuar o legado do meu pai, fundador da empresa en 1984”.
O peche da operación está supeditado “ao cumprimento das condicións habituais neste tipo de operacións”, recoñece CIE Automotive.
