Os contratos de Monbus investigados por Competencia no transporte escolar superan os 20 millóns.

A Comisión Galega da Competencia fixo pública outra batería de resolucións nas que rexeita os recursos presentados por Monbus para tentar pechar o expediente sancionador aberto contra a matriz e unha ducia de filiais do grupo. A entidade que preside Ignacio López Chaves investiga posibles amaños no concurso do autobús escolar da Xunta, o máis importante que licita o Goberno galego en materia de transporte despois das liñas regulares de viaxeiros por estrada. O grupo de Raúl López fixo con 28 dos 57 lotes nos que a Consellería de Educación repartiu 1.586 rutas, pero agora está baixo o foco de Competencia por posibles prácticas colusorias na conformación das UTEs coas que presentou as súas ofertas.

As impugnacións de Monbus e as respostas, todas desestimatorias, do organismo adscrito ao Instituto Galego do Consumo permiten delimitar o alcance da investigación, que afecta polo menos a tres lotes na provincia da Coruña e a outros sete na provincia de Pontevedra. Estes contratos foron adxudicados no ano 2021 por un prezo conxunto de 16,4 millóns. Con todo, o seu valor é maior, pois eran prorrogables pola Xunta para dous cursos máis coa posibilidade de incrementar ata un 20% o pago sobre a oferta inicial. Deste xeito, o valor real superaría amplamente os 20 millóns.

A investigación en Pontevedra

As últimas resolucións de Competencia detallan os lotes investigados na provincia de Pontevedra, algo que non se fixera público ata agora. Por exemplo, na resposta ao recurso presentado por Transmonbus, sociedade que exerce como grupo de consolidación da compañía e que está participada por Abanca, o documento indica que se están investigando a adxudicación dos lotes 43 e 44. Na mesma resolución a outro recurso, especifica que se impugna a investigación aos lotes 38, 40, 46, 50 e 51. Deste xeito, con contagotas, pódense listar os contratos que están no foco da investigación.

En Pontevedra son sete e foron adxudicados por preto de 12 millóns ás UTEs lideradas por Monbus. Son os seguintes:

Centros de Cuntis, A Estrada e Lalín, adxudicado por 1,05 millóns

Centros de Vilanova de Arousa, Cambados, Ribadumia e Illa de Arousa, adxudicados por 1,5 millóns

Centros de Marín e Bueu, adxudicados por casi un millón

Centros de Cangas e Moaña, adxudicados por 1,45 millóns

Centros de Redondela e Pazos de Borbén, adxudicados por 1,8 millóns

Centros de Pontevedra e Poio, adxudicados por 1,9 millóns

Centros de Pontevedra, adxudicados por casi 2 millóns

Estes contratos investigados por posibles amaños no concurso da Xunta súmanse a outros tres na provincia da Coruña, para os servizos que cubren centros educativos en Muros e Carnota; Outes e Noia; e Porto do Son. O primeiro foi adxudicado á UTE liderada por Monbus por 1,18 millóns; o segundo por 1,6 millóns e o terceiro por 1,4 millóns. O valor conxunto, polo tanto, sitúase nos 4,2 millóns, pero incrementaríase pola prórroga de dous anos.

A sanción a Monbus e Alsa

O procedemento que intenta frear Monbus co transporte escolar ten un precedente no reparto das liñas de transporte regular de viaxeiros por estrada. Competencia, que foi obrigada polos tribunais a reabrir a investigación por un posible cártel entre a compañía galega e Alsa, acabou sancionando a ambas por repartirse cinco concesións. Como avanzou Praza, o Pleno da entidade decidiu impoñer unha multa de 1,6 millóns a 21 empresas, todas filiais de Alsa e Monbus con excepción da propia matriz do grupo de Raúl López. Ademais, prohibe a contratación de ambas compañías durante un ano en concurso de transporte regular de viaxeiros por estrada da Xunta.

Os recursos naufragan

Ata o momento, Competencia fixo públicas unha decena de resolucións nas que desestima os recursos presentados por Monbus ou as súas filiais en relación á investigación aberta nas concesións de transporte escolar. Os argumentos sempre son os mesmos. Entende a entidade que neste punto do procedemento só un caso de indefensión ou dano irreparable pode plantexar o peche do expediente, polo que non entra noutro tipo de argumentos esgrimidos pola compañía.

O Pleno está descartando a indefensión, pois sinala que a apertura do expediente materializa o dereito da empresa de ser informada do contido da acusación; e Monbus non está alegando dano irreparable nas impugnacións, polo que a investigación segue adiante. Isto inclúe a Transmonbus e Autocares Monbus, como sociedades de cabeza do grupo, a pesar de que non se presentaron ao concurso.