Os sindicatos critican ao dono de Sargadelos e piden unha reunión coa Xunta: “Se quere irse que se vaia”

Máis tensión en Sargadelos. Representantes dos tres sindicatos (CIG, UGT e CC.OO.) critican ao dono, Segismundo García, que o pasado venres anunciou o inicio dun expediente temporal de regulación de emprego (ERTE) na fábrica de Cervo e dixo que dimitía das súas funcións executivas. Os sindicatos solicitaron unha reunión coas consellerías de Emprego e Cultura para facer fronte á situación.

Segundo explicou a Europa Press Lois Neto, voceiro da CIG, este luns, os traballadores da planta de produción atópanse desde as sete da mañá ás portas da factoría, e volveron asinar unhas follas de asistencia que remiten á Inspección de Traballo.

Tal e como comenta a plantilla, o propietario da histórica firma de cerámica atópase este luns e este martes en Londres nunha viaxe que tiña prevista e que decidiu non anular, a pesar da situación que afecta á factoría.

Así mesmo, os empregados indican, segundo sinala Lois Neto, que aínda non cobraron a nómina correspondente a novembro, aínda que normalmente recíbena o último día laborable de cada mes.

Un ERTE por “caprichos de neno pequeno”

A este respecto, o representante de CC.OO., José Antonio Zan, advirte que a plantilla segue fóra “e iso que xa lle comunicaron o venres a negativa por parte de Emprego ao señor Segismundo –García– que non pode facer un ERTE por causa de forza maior por caprichos de neno pequeno”.

“Que veña Inspección de Traballo e che mande facer unhas medidas preventivas non é unha causa de forza maior, que pode ser unha inundación, un incendio ou un apagón xeral. Iso de dicir que un ERTE se pode facer porque tes que poñer as normas de prevención de riscos é unha forma de rirse de todos”, criticou Zan.

Ademais, tachou de “impensable que a alguén se lle ocorra hoxe en día, despois de varios meses desde que veu inspección e mandou acometer unha serie de obras”, estar “sen facelas”.

Na súa opinión, “o peor de todo é que este señor tomou ás traballadoras como reféns da súa inconsciencia”. Deste xeito, valora que “se quere irse que se vaia, que non vai haber problema, que seguramente atope xente de sobra que queira tirar desta fábrica e continuar con ela”.

De feito, Zan conclúe que “o único problema que ten esta fábrica é que ten un neno pequeno de máis de 70 anos dirixíndoa”, por Segismundo García.