Rueda reclama maior protagonismo das comunidades na xestión dos fondos europeos
O presidente da Xunta reivindica o papel de Galicia como unha terra "moito máis á vangarda e innovadora" que fai catro décadas e subliña a importancia de seguir avanzando e achegando a Europa.
Acto ’40 Anos Medrando con Europa. Galicia Calidade da man dos fondos europeos’ – XUNTA
Comentarios
O presidente da Xunta insiste na necesidade dunha “Europa descentralizada” coa xestión dos fondos a cargo das comunidades autónomas, uns fondos que permitiron a Galicia durante as últimas catro décadas experimentar unha profunda evolución económica e social, mellorando infraestruturas, aumentando a esperanza de vida, modernizando o tecido produtivo e fortalecendo sectores estratéxicos.
Alfonso Rueda participou na xornada ’40 Anos Medrando con Europa. Galicia Calidade da man dos fondos europeos’ na que sinalou que os fondos europeos foron “imprescindibles” para este cambio, permitindo investimentos en sanidade, educación, innovación, servizos sociais e conectividade. Neste sentido, destacou que Galicia recibiu preto de 20.000 millóns de euros procedentes da Unión Europea.
Durante a súa intervención, o mandatario galego tamén fixo referencia aos desafíos de futuro e reclamou que o novo marco financeiro europeo manteña unha visión descentralizada, outorgando maior protagonismo ás rexións na xestión dos fondos.
Finalmente, Alfonso Rueda reivindicou o papel de Galicia como unha terra “moito máis á vangarda e innovadora” que fai catro décadas, e subliñou a importancia de seguir avanzando e aportando a Europa.
O acto foi inaugurado este sábado, 9 de maio, co izado da bandeira europea, á entrada do Centro Galego de Arte Contemporánea, xunto á bandeira de España e a de Galicia. Á xornada asistiron numerosos representantes políticos e institucionais, entre os que se atopaba o presidente do Parlamento de Galicia, Miguel Ángel Santalices, e diversos conselleiros e directores xerais, así como axentes sociais e culturais.
Nunha primeira mesa redonda, titulada ‘A visión da transformación de Galicia desde as institucións europeas’, moderada polo director xeral de Relacións Exteriores e coa UE, Jesús Gamallo, o eurodeputado do Grupo do Partido Popular Francisco Millán Mon; o antigo director xeral da Comisión Europea, José Manuel Silva Rodríguez; a xefa da unidade na Secretaría de Cultura e Educación do Parlamento Europeo, Ana Fernández, e a xefa da unidade de Renovables da Comisión Europea, Paula Rey, reflexionaron sobre os cambios experimentados na Comunidade nestas catro décadas.
