Os transportistas galegos reclaman bonificacións a Sánchez para paliar a escalada do petróleo

A guerra entre Israel e Estados Unidos con Irán disparou os prezos do petróleo. O barril de Brent superou os 91 dólares tras repuntar máis dun 26% nunha semana como consecuencia deste conflito bélico no corazón de Oriente Medio.

Ante esta situación, a Asociación Empresarial de Transportes de Mercadorías por Estrada de Galicia (Apetamcor) expresou “a súa profunda preocupación” pola evolución do prezo dos combustibles a raíz da guerra en Oriente Medio, polo que pide ao Goberno central reactivar a bonificación, similar á que se puxo en marcha en marzo de 2022, debido “á incerteza que esta situación está a xerar na viabilidade económica de moitas empresas do sector”.

A organización do transporte galego con maior número de empresas advertiu de que o combustible constitúe un dos principais custos na conta de explotación das empresas transportistas, polo que calquera incremento sostido do prezo “ten un impacto directo e moi significativo na súa actividade”.

“Elevada volatilidade”

“No actual contexto internacional, marcado por tensións xeopolíticas e conflitos como a guerra en Oriente Medio, o mercado enerxético continúa a mostrar unha elevada volatilidade que repercute directamente no prezo do gasóleo. Esta situación está a provocar unha crecente incerteza económica no sector do transporte, dificultando a planificación da actividade e reducindo os márxes de moitas empresas”, defenderon.

Nesta liña, desde Apetamcor solicitaron á Xunta que traslade esta demanda ao Executivo central e que apoie activamente ao sector.

Apetamcor conta con catro sedes repartidas nas catro provincias galegas e representa actualmente a máis de 1.600 empresas de transporte, que operan con arredor de 7.000 vehículos. “A evolución do prezo do combustible está a xerar unha gran incerteza nas nosas empresas. Necesitamos medidas que acheguen estabilidade e que permitan ao sector seguir a traballar con normalidade”, recalca a asociación.