Profand revalida o trono como maior pesqueira de España e gaña 30 millóns en 2025
O grupo que preside Enrique García Chillón supera de novo a facturación de Nueva Pescanova e vincula o crecemento do 10% nos ingresos, ata os 1.116 millóns, á relación con Mercadona.
Profand logra un récord de vendas e supera os mil millóns de ingresos
Comentarios
Profand consolídase como a maior pesqueira española tras acadar no pasado exercicio os 1.116 millóns de ingresos, un 10% máis que no curso anterior. O avance na cifra de negocio mantén ao grupo que preside Enrique García Chillón por riba de Nueva Pescanova, que acadou os 1.054 millóns en 2025, un incremento do 7,3%.
As dúas grandes pesqueiras galegas, as maiores de España, pecharon un ano positivo tanto nas vendas como nos beneficios. Explica Profand que o incremento da facturación está “motivado pola súa relación con Mercadona“, pois é un dos grandes provedores da cadea de Juan Roig; e vén acompañado dunha “mellora significativa na rendibilidade operativa”.
Traducido a números, o ebitda do grupo situouse por riba dos 97 millóns, un 27% máis que en 2024, “impulsado por unha combinación de maior eficiencia operativa, optimización de custos e o dinamismo da súa actividade comercial”, di a empresa nun comunicado. O beneficio situouse nos 30 millóns, duplicando os 14 millóns do exercicio anterior.
O ano récord de Profand coincide coa recuperación do control do 100% do accionariado por parte de Lucasiñas, brazo inversor de Enrique García Chillón, que comprou o 24% que estaba en mans de Corporación Financiera Alba, o holding dos March.
Investimentos e emprego
Ao longo do exercicio, a compañía investiu 23 millóns de euros para reforzar a súa capacidade produtiva, mellorar a súa eficiencia, adaptarse á demanda e impulsar proxectos estratéxicos en distintas áreas do negocio.
Profand tamén gaña tamaño polo lado do equipo humano. Durante 2025 incorporou 230 novos profesionais, elevando a súa plantilla global ata as 5.800 persoas. Destas, 3.000 son homes e 2.800 mulleres.
“Estes resultados reflicten a solidez do modelo de negocio de Profand e a súa capacidade para seguir xerando valor nun entorno competitivo, mantendo ao mesmo tempo a súa aposta polo crecemento responsable e sostible da man de Mercadona, o seu principal cliente“, di a compañía.
Avances en sustentabilidade
O 2025 tamén serviu para consolidar a estratexia de sustentabilidade a longo prazo, Profand4Future. O grupo continúa avanzando nos seus obxectivos de sustentabilidade mediante o impulso á descarbonización, apoiado na mellora da eficiencia enerxética, a incorporación de tecnoloxías innovadoras e o uso de enerxías renovables, que xa representan o 33% do total. Ademais, máis da metade da súa materia prima conta con certificacións avaladas pola Global Sustainable Seafood Initiative (GSSI), como MSC, ASC ou Global G.A.P. Este compromiso reforzouse en 2025 con novas certificacións MSC para o gambón austral argentino, tanto en augas provinciais de Chubut (flota costeira) como en augas federais argentinas (flota de altura).
En liña con estes avances, a compañía logrou reducir nun 14% a pegada de carbono dos alcances 1 e 2 por tonelada producida, o que evidencia unha maior eficiencia nos procesos ao longo de toda a súa cadea de valor. Así mesmo, logrou revalorizar o 98% dos seus residuos, un resultado especialmente significativo que reflicte unha xestión altamente eficiente e plenamente aliñada cos principios de economía circular.
