Récord de participación nos premios PEL da Deputación da Coruña, que roza as 150 candidaturas
O xurado dos Premios PEL reuniuse este xoves para avaliar as 145 candidaturas presentadas para esta oitava edición que repartirá 80.000 euros a cada unha das empresas galardoadas.
Imaxe do xurado dos Premios PEL 2026 da Deputación da Coruña / Deputación da Coruña
Comentarios
Conta atrás para a oitava edición dos Premios PEL. A sede da Deputación da Coruña acolleu este xoves a reunión do xurado, que comezou a avaliar as 145 candidaturas presentadas.
Os Premios PEL afrontan o ano con récord de participación despois de que se presentasen un total de 132 empresas e autónomos aos galardóns á mellor iniciativa emprendedora, mellor traxectoria empresarial, mellor iniciativa de territorio sostible e mellor iniciativa empresarial singular. A estas súmanse as 13 candidaturas impulsadas polo xurado á categoría honorífica de mellor iniciativa transformadora do rural.
Por concellos, o de A Coruña concentra o maior número de candidaturas presentadas, con 55, seguido de Santiago de Compostela, con 22, e Oleiros, con 7.
“Durante a reunión celebrada hoxe, os membros do xurado avaliaron as candidaturas presentadas e puxeron en común as puntuacións outorgadas a cada unha delas. A valoración terá en conta criterios como a idea de negocio, o impacto e a visibilidade no territorio, a innovación, a responsabilidade social empresarial e a capacidade de transformación económica e social das empresas participantes”, destaca a Deputación da Coruña.
Con esta nova edición dos Premios PEL, a entidade que preside Valentín González Formoso busca recoñecer, dar visibilidade e apoiar proxectos empresariais capaces de xerar actividade, emprego e novas oportunidades nos municipios da provincia. As empresas galardoadas daranse a coñecer o venres 19 de xuño nun acto que se celebrará no Coruña Estudio Inmersivo (CEI), na Cidade das TIC da Coruña nun acto que contará coa presenza do propio Valentín González Formoso, así como da deputada da área de Emprego, Rosa Ana García, dos membros do xurado e de representantes do tecido empresarial e social da provincia.
Ademais do galardón, os premiados recibirán un total de 80.000 euros. O xurado estivo presidido polo presidente da Confederación de Empresarios da Coruña, Antonio Fontenla Ramil, e contou como secretario con Manuel Vázquez Sesmonde, xefe do Servizo de Desenvolvemento Territorial, Sectores Produtivos, Emprego e Transición Ecolóxica da Deputación da Coruña. Tamén participaron José Manuel Cotos Yáñez, profesor titular da Universidade de Santiago de Compostela; Antonio García Lorenzo, catedrático de Escola Universitaria na Universidade da Coruña e membro do grupo de investigación Jean Monnet de Competencia e Desenvolvemento; Rosa Mary Cardeso Trillo, secretaria xeral da Cámara de Comercio de Santiago de Compostela; Romyna Fraga Lesta, xefa da área de Empredemento da Cámara de Comercio da Coruña; e Carme Pampín Casal, cofundadora e CEO de Galchimia S.A., empresa gañadora da cuarta edición dos Premios PEL.
O presidente do xurado, Antonio Fontenla, destacou o elevado nivel das propostas presentadas e sinalou que as candidaturas “continúan a subir o listón ano tras ano”, tanto pola calidade dos proxectos como pola súa capacidade para xerar valor no territorio.
