Russula, xigante discreto do aceiro: 190 millóns en activos, beneficio récord proxecto estrela con Hydum Steel

“Russula naceu fai 35 anos cun encargo concreto: desmantelar unha aceiría situada en España e poñela de novo en funcionamento en Malaisia. Foi o primeiro proxecto da empresa e tamén o noso primeiro cliente. Dende entón Russula creceu, especializouse, entrou en novos mercados e conquistou a confianza de centos de clientes distribuídos por máis de 35 países”. Contao Manuel Maneiro, fundador da enxeñería coruñesa, e alude a un dos grandes proxectos industriais que fracasaron na Galicia dos oitenta: Sidegasa, a siderúrxica de Teixeiro que non puido ser, e cuxo peche se decretou en 1988.

A partir de aí, todo foi cara arriba na enxeñería, hoxe baixo a cabeceira holding Russula Corporación, coa súa filla Eva á fronte. A compañía está especializada en proxectos chave en man e en todo o que teña que ver con trens de laminación de aceirías. Con todo, pouco ou nada se sabía ata agora das dimensións reais de unha das compañías que máis fondos Next Generation levou este ano ao abeiro do Perte de Descarbonización, con 60 millóns de euros.

Actividade en seis países

E é que o balance de Russula Corporación describe unha compañía con uns activos de practicamente 190 millóns de euros ao peche de 2024, cun inmobilizado de 60 millóns, en gran medida derivado do fondo de comercio resultante da absorción dunha das súas compañías vinculadas, Hydnum Steel, coa que levou a cabo no seu momento unha fusión por absorción.

Russula Corporación opera como cabeceira holding do grupo, cun patrimonio neto de 92,6 millóns, que se corresponde cos seus fondos propios (capital e reservas), segundo as contas e balance da compañía presentados no Rexistro Mercantil da Coruña. A súa conta de resultados ofrece tamén a perspectiva de todo o seu negocio, que se reparte entre en España, Brasil, Arxentina, Estados Unidos, India e México. En case todos estes países conta con filiais e presenza física.

Vendas de 117 millóns

Ao peche de 2024, a cifra de negocio de Russula Corporación foi ata os 117,8 millóns de euros, o que arroxa un crecemento do practicamente o 5% sobre os 112,2 millóns que asinara en 2023. O beneficio de explotación situouse en 9,4 millóns de euros, cun lixeiro descenso sobre o exercicio anterior, e o resultado antes de impostos alcanzou os 8,4 millóns. O beneficio neto do grupo si avanzou e creceu ata os 6,4 millóns, cun incremento do 36% sobre os 4,7 millóns de resultado despois de impostos de 2023.

Sen saír da familia, a propiedade do grupo dividiuse este ano en dous. Russula Corporación era ata agora 100% propiedade de Helvella, unha sociedade patrimonial familiar. En febreiro procedeuse á escisión en dous desta sociedade holding, segundo consta no Rexistro Mercantil, en favor de Helvella Patrimonial e Hevella Industrial, dúas sociedades de nova creación. Esta operación fixose en paralelo ao crecemento dun dos proxectos estrela de Russula: a aceiría verde de Puertollano, que pivota sobre o proxecto Hydnum.

O plan de Hydnum en Puertollano

Hydnum Steel conseguiu este mesmo ano unha financiación de 60 millóns procedentes do Perte de Descarbonización Industrial, o programa estratéxico aprobado para acelerar a transición ecolóxica do tecido industrial. Esta investimento supón un impulso definitivo para a construción da primeira planta de aceiro “verde” na península ibérica, situada en Puertollano (Cidade Real).

A planta atópase en fase avanzada de tramitación administrativa e validación de enxeñería e o calendario previsto sinala que as obras comecen a finais deste ano. A produción inicial alcanzará 1,5 millóns de toneladas de aceiro ao ano, abastecendo a sectores clave como a automoción, a construción ou as enerxías renovables.