Stellantis e Inditex non abondan: o PIB galego crece polos servizos fronte á contracción da industria
Os servizos públicos e as actividades profesionais lideran a contribución ao crecemento do PIB en Galicia en 2025, mentres a industria sitúase á cola; BBVA Research advirte que a automoción, atascada co vehículo eléctrico, terá unha influencia decisiva na evolución do PIB.
El presidente de la Xunta, Alfonso Rueda, en una imagen de archivo en la factoría de Stellantis en Vigo / Xunta
Comentarios
BBVA Research presentou este mércores as súas previsións sobre a evolución económica de Galicia, nas que estima que o PIB da comunidade aumentará un 2,3% en 2025, por baixo do 2,5% estatal; e un 1,8% en 2026, por riba da media española, para a que o centro de estudos calcula un avance do 1,7%. As previsións de BBVA, en todo caso, marcan unha clara desaceleración desde o 3,3% de crecemento de 2024, tendencia común ao conxunto do Estado.
O informe apunta ao consumo interno e ao gasto público como elementos clave para o crecemento, fronte á desaceleración das exportacións e do turismo, afectado polos incendios deste verán, e a “debilidade” da industria. De cumprirse as previsións, a taxa de paro podería reducirse ata o 8,6% e poderían crearse 29.500 empregos ata 2026. A contribución sectorial prevista deixa a dúas alavancas clave da economía galega, como a industria e o agroalimentario, á cola en canto á súa aportación ao avance do PIB e o emprego. Fronte a eles, os servizos pasarían a liderar o crecemento.
Esta distribución debuxa tamén unha distinción xeográfica, co predominio do sector agroalimentario no rural progresando a menor velocidade, e os maiores servizos do ámbito urbano, que marcan mellores ritmos de crecemento.
Dúbidas e certezas de Stellantis e a automoción
