Un tribunal revoga a prohibición de contratar co sector público que precipitou o concurso de Arias Infraestruturas
O Tribunal Superior de Xustiza de Madrid sostén que a administración realizou “unha interpretación incorrecta dos requisitos de solvencia económica e financeira esixibles, en particular no relativo ao cómputo do patrimonio neto da sociedade”.
Arias Infraestruturas acometeu as obras de reforma da cuberta e estrutura metálica do estadio de Riazor. Foto: Arias Infraestruturas
Comentarios
O Tribunal Superior de Xustiza de Madrid anula a decisión administrativa de 2022 que retirou a súa clasificación como empresa contratista de obras do sector público a Arias Infraestruturas tras estimar, catro anos despois, o recurso presentado pola compañía.
“A resolución xudicial chega unha vez finalizado o proceso concursal da compañía, e por iso sen posible virtualidade práctica, máis alá de corrixir unha resolución contraria ao Dereito, que podería ter evitado a extinción da histórica compañía”, explican desde o despacho de avogados da compañía.
Arias Infraestruturas, unha das construtoras históricas da Coruña e cunha longa traxectoria en Galicia, viu revogada unha clasificación clave para poder contratar coas Administracións Públicas, circunstancia que “bloqueou de forma directa a súa capacidade operativa e condicionou de maneira decisiva a viabilidade da empresa”, que entrou en concurso de acredores nos meses seguintes.
A decisión do TSX de Madrid
Na sentenza, do 25 de marzo de 2026, o Tribunal entende que a administración realizou “unha interpretación incorrecta dos requisitos de solvencia económica e financeira esixibles, en particular no relativo ao cómputo do patrimonio neto da sociedade”.
A resolución aclara que os préstamos participativos, instrumentos habituais de financiamento empresarial, deben ser considerados como patrimonio neto a efectos de determinar a solvencia da empresa, conforme á normativa mercantil e á xurisprudencia aplicable. Sobre esta base, a Sala entende que a retirada da clasificación carecía de fundamento xurídico suficiente.
O TSX madrileño estima íntegramente o recurso, anula as resolucións impugnadas e recoñece o dereito da compañía a manter a súa condición de contratista coas Administracións Públicas, nun procedemento cuxa dirección xurídica foi asumida polo despacho Navarro. O pronunciamento pon de manifesto que unha das decisións que marcou a traxectoria recente da compañía non se axustaba aos criterios legais esixibles.
