Abanca ficha a dous exdirectivos de Beka Finance para reforzar os seus servizos a empresas.

• Fitch volve a mellorar o rating de Abanca, que encadea sete subidas nun ano.
• Os números do Dépor: factura o dobre no seu retorno á Segunda División, pero perde 7 millóns.

Abanca formou un novo equipo senior de Debt Advisory que reforzará os seus servizos a empresas con asesoramento sobre financiamento e débeda. O banco de Juan Carlos Escotet explorou o mercado de fichaxes e incorporou para esta tarefa a Federico Silva e Javier Barrenechea, con unha traxectoria de 20 anos en banca de investimento. Ambos proceden de Beka Finance, onde Silva era responsable do negocio de renda fixa e Barrenechea director da división de Capital Markets. Agora intégranse no departamento de Originación de Mercados de Abanca, que dirixe José de Pablo.

A entidade financeira explica que esta incorporación ten por obxectivo axudar ás empresas a xestionar, optimizar e obter financiamento por canles non tradicionais, ben con investidores en operacións privadas, ou ben saíndo ao mercado de capitais. Destaca, ademais, que Silva e Barrenechea traballaron para grandes clientes internacionais e pecharon operacións tanto en mercado público como en formato private debt en múltiples sectores.

A incorporación do equipo de Debt Advisory, integrado na dirección xeral de Mercado de Capitais, Xestión e Distribución dirixida por Juan Luis Vargas-Zúñiga de Mendoza, “enmárcase na vontade da entidade de ofrecer un servizo cada vez máis completo ao mundo empresarial e xerar produto para os seus clientes investidores nun entorno no que cada cliente e cada operación requiren solucións tailor-made“, é dicir, feitas á medida.

Abanca subliñou que actuará “potenciando o mercado de negocio de empresas, ampliando a súa actual oferta de produtos co fin de satisfacer aos clientes que poidan estar pensando en crecementos potenciais ou mellora das súas estruturas de financiamento”.