Abanca, Kaleido e Valtalia, á cabeza en medio ambiente no Atlas Galego da Empresa Comprometida

Unha das sorpresas relativas nesta edición do Atlas Galego da Empresa Comprometida é o medio ambiente. A categoría mostra unha mínima melloría e alcanza os 5,2 puntos, pero representa o mellor resultado das últimas edicións. Esta progresión explícase principalmente polos avances nos controis da emisión de gases efecto invernadoiro e na medición da pegada de carbono. A pesar diso, os datos tamén revelan que a transición ecolóxica segue a ser un proceso incompleto pois na maioría das variables e parámetros que se avalían, non se detectan progresos destacados.

Esta categoría examina como as oitenta empresas e grupos consolidados do Atlas integran a descarbonización e a xestión eficiente da auga fronte ao contexto enerxético e normativo actual. Máis aló das intencións, di o informe, avalíase a execución directa: avanzar na economía circular e na preservación da biodiversidade como probas dun impacto positivo e tangible no ecosistema galego.

A clave da pegada de carbono

De acordo co estudo, presentado esta semana en Santiago coa presenza do presidente da Xunta, a mellora experimentada nesta categoría débese, sobre todo, ao avance observado na variable pegada de carbono, que pasa de 2,9 a 3,8 puntos sobre 10. A esta progresión seguen a maior planificación medioambiental empresarial observada e unha mellor xestión dos recursos hídricos.

Pola contra, di o estudo, prodúcese certa relaxación nalgunhas certificacións ambientais como a do uso de enerxía renovable e a eficiencia enerxética. De feito, o número de empresas que alcanzan a máxima puntuación aumenta este ano en seis das sete variables, sendo precisamente na do uso de enerxía renovable e eficiencia enerxética onde se reduce lixeiramente.

Tres grupos á cabeza

En canto ás estrelas obtidas polas empresas do Atlas Galego da Empresa Comprometida na categoría de Medio Ambiente, o estudo sinala que se confirma que un 53% (fronte ao 38% de 2024) alcanza entre 3 e 5 estrelas das 5 posibles. Isto supón que máis da metade das organizacións nesta edición superan a metade da puntuación máxima.

Destaca un grupo de tres empresas (o 4%), o mesmo número que no exercicio anterior, que obtén a excelencia coa totalidade das estrelas, sobresae, segundo os autores, polo seu rigoroso respecto ambiental, o cumprimento normativo, a fixación de obxectivos de redución da pegada de carbono e a valorización de residuos: Abanca, Kaleido Ideas & Logistics e Valtalia.

Con catro estrelas

Adicionalmente, destacar trece empresas que alcanzan as 4 estrelas das 5 posibles, sendo o sector industrial o que máis empresas achega a esta selección de marcada calidade ambiental. Trátase de BorgWarner, Citanias, Conservas Friscos, Corporación Fillos de Rivera, Cupa Group, Emalcsa, Gestán, Greenalia, Legalpin, Nauterra, Optare Solutions, Profand e Vimbio Corp.

No lado contrario, o Atlas sinala que nesta edición son quince as empresas que non alcanzan ningunha estrela en Medio Ambiente. O feito de que o 19% das empresas da mostra non acaden ningunha estrela nesta categoría evidencia un claro marxe de mellora nunha materia que, en vez de restar competitividade, potencia e mellora a estrutura empresarial e mesmo permite optimizar o uso dos recursos e reducir custos.

Os resultados da sexta edición do Atlas Galego da Empresa Comprometida foron presentados esta semana en Santiago ante máis dun cento de persoas. A sexta entrega do estudo contou co apoio da Xunta, Profand, Gadisa, Copasa e Cobre San Rafael.