Alfonso Rueda, na presentación do Atlas Galego da Empresa Comprometida

Puesta de longo para a sexta edición do Atlas Galego da Empresa Comprometida, que o próximo martes presentará os seus resultados nun acto en Santiago, no San Francisco Hotel Monumento (Campillo de San Francisco, 3), a partir das 12 horas. A cita permitirá coñecer as principais cifras e conclusións do estudo que impulsa Economía Dixital Galicia desde o ano 2020 e que analiza a contribución das empresas galegas na creación de riqueza de xeito sostible, medindo con parámetros obxectivos o seu impacto no territorio, as persoas e o medio ambiente.

O Atlas Galego da Empresa Comprometida naceu da man do consenso europeo para incorporar a dimensión ambiental, social e de gobernanza ás políticas empresariais e avanzar cara un sistema produtivo descarbonizado e sostible. O informe que se presenta o próximo 24 de marzo recolle a información de 80 empresas, que suman conxuntamente máis de 56.000 millóns de facturación e que cederon os seus datos nun exercicio de transparencia para a elaboración do estudo. O Atlas organiza esa información en catro grandes categorías para coñecer a situación e a evolución das políticas ESG no tecido produtivo galego: Bo Goberno, Entorno, Medio Ambiente e Persoas.

Algo máis que unha presentación

A xornada organizada por Economía Dixital Galicia suporá algo máis que a presentación dun informe. O evento reunirá empresarios, responsables de sustentabilidade, altos representantes institucionais e personalidades do mundo académico, permitindo establecer un diálogo sobre os retos que afronta Galicia para preservar a competitividade e avanzar na descarbonización. O acto contará coa participación do presidente da Xunta, Alfonso Rueda, que asiste por segunda vez a unha presentación de resultados do Atlas. O proxecto contou co respaldo doutros destacados membros do Goberno galego, como a conselleira de Economía, María Jesús Lorenzana, e, antes, o seu predecesor no cargo, Francisco Conde.

Ademais da intervención do dirixente autonómico, a xornada permitirá coñecer as reflexións do director de sustentabilidade de Inditex, Fernando de Bunes Ibarra. O directivo da multinacional galega manterá un diálogo co director de Economía Dixital Galicia, Julián Rodríguez, sobre os resultados do Atlas Galego da Empresa Comprometida e o contexto político e normativo no que se están a desenvolver as estratexias de descarbonización.

Falando de ESG

Recoller datos, interpretalos correctamente e reflexionar sobre eles. Eses tres pasos fundamentais para a elaboración do Atlas, compoñen dalgún xeito a propia estrutura da presentación dos seus resultados. Non só a través do pensamento do principal responsable de sustentabilidade de Inditex, senón tamén coa contribución dunha mesa redonda que permitirá afondar na información recollida no estudo.

Melisa Pagliaro, directora de RSC de Gadisa Retail, e María Bastida, catedrática de Organización de Empresas da USC, analizarán a situación actual das políticas de sustentabilidade e os retos que plantexan as políticas de ESG, nun diálogo moderado pola xornalista de Economía Dixital Galicia, Cristina Díaz.

Asistir á presentación do Atlas

A sexta entrega do Atlas Galego da Empresa Comprometida contou co apoio da Xunta de Galicia, Profand, Gadisa, Copasa e Cobre San Rafael. Se desexa asistir á presentación, que terá lugar o próximo martes, 24 de marzo, no San Francisco Hotel Monumento (Campillo de San Francisco, 3) de Santiago a partir das 12 horas, pode inscribirse no seguinte enlace.