A patronal galega alerta do impacto do plan de Yolanda Díaz para encarecer o despedimento

A Confederación de Empresarios de Galicia (CEG) cuestiona a proposta da vicepresidenta segunda e ministra de Traballo e Economía Social, Yolanda Díaz, que inclúe como obxectivo para este ano o encarecemento do despedimento e a modificación das regras de representación no diálogo social.

A CEG sinalou nun comunicado que é “especialmente grave” cuestionar a representatividade das organizacións empresariais e tratar de debilitar a participación da Confederación Española da Pequena e Mediana Empresa (Cepyme) na negociación de cuestións que afectan directamente a miles de pequenas e medianas empresas.

“As pemes constitúen a inmensa maioría do tecido empresarial galego e español e son esenciais para o emprego, a cohesión territorial e o mantemento da actividade económica, especialmente no ámbito rural”.

Juan Manuel Vieites, presidente da patronal, lembrou que “o diálogo social debe sustentarse no respecto institucional, a pluralidade e a seguridade xurídica”. “Calquera intento de alterar unilateralmente os equilibrios de representación supón deteriorar un modelo que contribuíu durante décadas á estabilidade económica e laboral do noso país”, criticou.

Así mesmo, advertiu de que “novas medidas orientadas a incrementar os custos empresariais, como o encarecemento do despedimento, súmanse a un contexto xa especialmente complexo para as empresas, marcado polo aumento continuado dos custos laborais, a presión fiscal, a inflación regulatoria e a crecente burocracia administrativa”.

“As empresas galegas, e particularmente as microempresas e pemes, necesitan estabilidade, certidume e medidas que favorezan a inversión, a competitividade e a creación de emprego, non novas cargas que dificulten a súa viabilidade. Resulta especialmente preocupante seguir impulsando reformas laborais sen unha avaliación rigorosa do seu impacto real sobre as pequenas empresas e os autónomos”, sentenciou Vieites.

Diálogo social

Na mesma liña falou a Confederación Empresarial de Pontevedra (CEP), subliñando que o diálogo social é “o alicerce de toda democracia”. “Se queremos que as nosas empresas se convertan nun referente, se queremos unha economía próspera e a proliferación de organizacións punteiras, debemos escoitalas. A situación non é a mesma en todo o territorio nacional, nin todos os negocios contan co mesmo volume de actividade e ingresos”, engadiu o presidente da CEP, Jorge Cebreiros.

Segundo detallou, tomar decisións que afectan ao emprego e á competitividade sen contar con quen representa as empresas é un “erro” que ten “consecuencias reais”.

A Confederación Empresarial de Ourense (CEO) tamén defendeu o diálogo social ante o anuncio do Goberno de adoptar medidas no ámbito laboral excluíndo os axentes sociais.

Nun comunicado, compartiu a “inquietude” trasladada por Cepyme respecto á proliferación de anuncios e decisións adoptadas sen unha negociación efectiva previa. “O diálogo social foi unha das ferramentas máis valiosas para garantir estabilidade económica, seguridade xurídica e cohesión social no noso país. Debilitalo mediante plantexamentos unilaterais ou fórmulas de interlocución meramente formais supón poñer en risco un modelo que permitiu afrontar con éxito etapas especialmente complexas para o país”, insistiu a CEO.