O Atlas Galego da Empresa Comprometida logra un récord de participación e amplía a súa análise á IA e á xeopolítica

Economía Dixital Galicia presentará a próxima semana os resultados do Atlas Galego da Empresa Comprometida, un proxecto que naceu no ano 2020 como un estudo pioneiro para medir a contribución das empresas a unha economía máis sostible na súa relación co medio ambiente, as persoas e o territorio onde se desenvolve a actividade produtiva. Asentado como unha ferramenta analítica de referencia para avaliar o compromiso do tecido empresarial galego con esta gran transformación, o Atlas chega á súa sexta edición mantendo a súa arquitectura metodolóxica estable, aínda que nun escenario global cambiante polos avances tecnolóxicos, as variacións normativas e as tensións xeopolíticas.

A vocación do estudo é traducir a parámetros obxectivos o compromiso empresarial, expresado en catro grandes categorías: o Bo Goberno, o Entorno, o Medio Ambiente e as Persoas. Para acadar este obxectivo é imprescindible a colaboración das empresas, que son as que transparentan a información e achegan, polo tanto, a materia prima para a realización do estudo. Nesta sexta edición, o Atlas acadou un récord de participación. Foron 80 sociedades con domicilio social en Galicia as que ofreceron os seus datos para a elaboración do informe, o que iguala o número máis elevado de participantes na traxectoria do estudo.

A participación no Atlas Galego da Empresa Comprometida alcanzou unha vez antes as 80 empresas. Foi no ano 2023, aínda que agora a mostra é máis significativa se atendemos aos datos de facturación e emprego. Naquel exercicio, o volume conxunto de negocio das empresas participantes situábase nos 46.893 millóns e o emprego superaba as 242.561 persoas. Na última edición, a facturación elévase por riba dos 56.000 millóns e o emprego xerado supera os 244.000 traballadores. En ambos parámetros son cifras récord.

As empresas que se sumaron ao proxecto durante o período de recollida de datos, que se desenvolveu desde finais do ano pasado ata febreiro deste ano, compoñen unha mostra formada por grandes corporacións e empresas de menor tamaño en canto a facturación e plantilla. Nesta edición hai seis compañías cun volume de negocio superior aos 1.000 millóns; catro sociedades que facturan entre 500 e 1.000 millóns; e outras 15 cunha cifra de negocio entre 100 e 500 millóns. As 55 empresas do Atlas restantes facturan menos de 100 millóns de euros.

En canto ao tamaño das plantillas, 19 das entidades participantes (23,8%) teñen máis de 1.000 traballadores, o que representa o 96,1% do conxunto do Atlas. As compañías con menos de 50 empregados supoñen o 22,5% do total; o 16,3% ten unha plantilla de entre 50 e 100 traballadores; o 23,8%, entre 100 e 250 postos de traballo directos; o 7,5%, entre 250 e 500 empregados; e o 6,3% oscila entre os 500 e 1.000 traballadores.

O Atlas amplía a súa análise

Aínda que o Atlas mantivo unha constancia metodolóxica ao longo das súas seis edicións, o estudo tamén foi permeable aos cambios sociais e políticos que condicionan o desenvolvemento das políticas de sostibilidade e do proceso de descarbonización, e que nos últimos anos se produciron a velocidade vertixinosa. Nas súas distintas entregas, o estudo cuestionou ás empresas sobre o impacto do Covid, o proceso inflacionista ou a crise enerxética.

Nesta sexta edición, o Atlas Galego da Empresa Comprometida incorpora unha sección específica de seguimento da conxuntura económica e xeopolítica, co fin de contextualizar os resultados e interpretar mellor o alcance das decisións empresariais nun mundo que xa non só está tensionado por guerras comerciais e aranceis, senón tamén pola outra guerra, a das bombas que destrúen vidas e territorios.

A sexta edición do informe tamén dá continuidade ao escrutinio da intelixencia artificial debido ao carácter disruptivo deste avance tecnolóxico. A IA é un elemento capaz de alterar procesos produtivos, estruturas organizativas e vantaxes competitivas. Desde a concepción do Atlas, analizar como se posicionan as empresas galegas ante este fenómeno resulta esencial.

Presentación dos resultados o próximo martes

O próximo martes, 24 de marzo, Economía Dixital Galicia presentará os resultados da sexta edición do Atlas Galego da Empresa Comprometida. Será un acto en Santiago, no San Francisco Hotel Monumento, no que participarán empresarios, responsables de sostibilidade de grandes compañías galegas e voces do mundo académico. Entre todos realizarán as primeiras valoracións sobre os resultados do traballo e sobre os principais retos, globais e locais, que afronta o proceso de descarbonización. Para asistir ao evento, que se celebrará a partir das 12 horas, é necesario inscribirse na web de Economía Dixital.

A sexta entrega do estudo contou co apoio da Xunta de Galicia, Profand, Gadisa, Copasa e Cobre San Rafael. O economista Marcelino Fernández Mallo e o profesor da UDC Fernando de Llano foron os directores técnicos do Atlas, que contou desde o nacemento do proxecto coa colaboración do equipo de Táctica e Estratexia de Comunicación, capitaneado por Virgilio Costas.