Rueda mira ao capital circulante e á loxística para apoiar as empresas pola guerra de Oriente Medio

O presidente da Xunta aposta pola colaboración entre empresas e administracións á hora de fomentar un crecemento económico de Galicia sostible e respectuoso co contorno e o territorio. Así o apuntou este martes na presentación da sexta edición do Atlas Galego da Empresa Comprometida, proxecto impulsado por Economía Dixital Galicia.

“Galicia pode medrar e medrar ben. Isto depende de todos, pero moi especialmente de ter un tecido económico comprometido”, apuntou Alfonso Rueda no seu discurso de clausura do acto, no que tamén fixo mención aos efectos que está a ter na economía o conflito de Oriente Medio.

Neste sentido, Rueda apuntou que o Executivo galego está a facer un seguimento coas empresas máis afectadas e avanzou que está a traballar en elaborar o seu propio abano de iniciativas para apoiar os diferentes sectores, tendo en conta os problemas que poden ter as empresas co capital circulante e os investimentos feitos previamente así como a parálise que haberá “nas relacións comerciais, a loxística ou o envío de produtos”.

En canto ás medidas do Goberno central, destacou que, ao pivotar estas sobre impostos cedidos total ou parcialmente ás comunidades autónomas, isto implica que “Galicia achegará máis de 120 millóns de euros nestes tres meses” para aplicar estas medidas.

Empresas máis comprometidas

O mandatario galego valorou a importancia do Atlas Galego da Empresa Comprometida, unha ferramenta de diagnóstico, que avalía entre un gran número de empresas galegas valores como o bo goberno, o medio ambiente, a relación co contorno, as persoas ou o uso da intelixencia artificial. En concreto, este ano participaron 80 empresas, cunha facturación conxunta superior aos 56.000 millóns de euros, o que representa case o 70% do PIB galego. Rueda valorou positivamente que cada vez sexan máis as empresas que buscan compaxinar os beneficios económicos con outros obxectivos “que deixan pegada na terra”.

Nesta liña, Alfonso Rueda valorou a resiliencia e competitividade das empresas galegas, así como o seu compromiso co territorio. Tamén subliñou o importante papel que xogan na boa marcha económica da comunidade. Así, entre outros datos, lembrou que a economía galega medrou un 2,6% o pasado ano; que o paro sitúase na cifra máis baixa desde 2007; e que o seu volume exportador rozou en 2025 os 31.000 millóns de euros, o que a situou entre as cinco comunidades autónomas máis exportadoras.

Fomentar investimentos

“Cada vez máis, confíase en Galicia para investir”, resaltou o presidente da Xunta que apuntou que parte destes bos datos débense tamén á estabilidade de Galicia e ás políticas de apoio ás empresas. Entre outras medidas, sinalou que o Executivo autonómico traballa na simplificación e axilización administrativa, a través de iniciativas como a Oficina Económica de Galicia; e que o apoio á innovación é unha prioridade estratéxica.