Manuel Rodríguez (Fundación RIA): “Compartimos con ED a visión de aportar un espazo de reflexión para impulsar mellores prácticas”

A presentación do Atlas Urbano da Sostibilidade en Galicia, que este xoves desvelou as conclusións da súa segunda edición, foi o primeiro evento que acolleu Casa RIA, o novo espazo na rúa Virxe da Cerca de Santiago da fundación do arquitecto David Chipperfield, en colaboración cunha entidade externa, Economía Dixital Galicia. «Estamos moi ilusionados de que o primeiro acto sexa a presentación dun atlas urbano da sustentabilidade, porque é un traballo rigoroso que nos permite medir en que lugar estamos e como podemos mellorar», dixo o director da Fundación RIA, Manuel Vázquez, que exerceu como anfitrión na presentación do estudo.

Casa RIA pretende converterse nun espazo de reflexión e de debate sobre a relación entre o medio natural e o construído, un asunto que non só incumbe á arquitectura, senón tamén ao desenvolvemento sostible das cidades de maneira que garantan o benestar de quen as habita. Neste sentido, o director de Fundación RIA destacou a «visión compartida» con Economía Dixital Galicia sobre o que ambas as institucións poden achegar á sociedade: «Un espazo de reflexión, un punto de encontro co que impulsar mellores prácticas e mellores políticas que permitan conservar e impulsar a nosa calidade de vida«, sinalou.

Vázquez agradeceu ao grupo de medios a elección de Casa RIA para a presentación do estudo e ao coordinador do Atlas, Xosé Gabriel Vázquez, a elaboración do «extenso e rigoroso traballo». «Permítenos ver unha imaxe completa de Galicia fronte ao reto dos Obxectivos de Desenvolvemento Sostible«, apuntou.