Lorenzana lamenta que a falta de conexión eléctrica "afaste a Lugo do mapa industrial para os próximos anos"

A conselleira de Economía e Industria, María Jesús Lorenzana, mostrouse este martes “razoablemente satisfeita” coa proposta de nova planificación eléctrica que está preparando o Goberno central, aínda que lamentou que condene á provincia de Lugo e a elimine do mapa industrial dos próximos anos. Fíxoo así alusión directa á aparente inviabilidade, coa planificación actual, para que a planta da portuguesa Altri se instale en Palas de Rei.

Lorenzana, acompañada polo secretario xeral de Industria e Desenvolvemento Enerxético, Nicolás Vázquez, e o director xeral de Planificación Enerxética e Minas, Pablo Fernández Vila, reuniuse este martes co secretario de Estado de Enerxía, Joan Groizard, e con responsables de Rede Eléctrica Española (REE) para abordar a proposta de planificación da rede de transporte eléctrico para o período 2025-2030. Á espera de coñecer o borrador completo, dixo, “en Galicia podemos dicir que estamos razoablemente satisfeitos co resultado da reunión para boa parte do territorio e, en concreto, para tres provincias que son A Coruña, Pontevedra e Ourense, onde se reforzan na prácticamente súa totalidade as diferentes posicións e os diferentes ámbitos que se solicitaron desde o Goberno de Galicia”, subliñou.

Cal e area

“Estamos satisfeitos de que toda a zona da cidade da Coruña e a Autoridade Portuaria, xunto coa zona de Ferrol, veñan reforzadas, e de que tamén se poida aproveitar a enerxía producida pola maioría das centrais renovables da zona de Ourense, así como os reforzos para as zonas de transición xusta, As Pontes e Meirama”, afirmou. Con todo, Lorenzana expresou a súa “tristeza” polo feito de que “unha provincia como Lugo está sendo eliminada do mapa industrial, ao non estar reforzada en ningún punto, en ningunha zona para o consumo industrial”, argumentou. Isto significa, continuou, que “mentres dure esta planificación, non se poderá instalar ningunha industria mediana ou grande nesta provincia, ao non estar reforzada e non ter subministración eléctrica para ela”, lamentou.

“É a única provincia que non está reforzada e está condenada e apartada do mapa industrial para os próximos anos”, salientou, para garantir que “o Goberno de Galicia seguirá loitando para que Lugo poida ter un futuro económico e industrial”, aínda que a realidade, enfatizou, “é que tendo en conta as conexións eléctricas que ten actualmente, non é unha posibilidade para ningunha empresa mediana ou pequena poder instalarse nesta provincia”.