Miles de persoas enchen Santiago no Día das Letras para denunciar a «emerxencia lingüística» do galego

• Rueda celebra os dous anos da súa vitoria electoral e dá por cumprido «máis do 85%» do seu programa
• Rueda defende o seu plan contra o fraude nas baixas laborais e avanza «medidas valentes» contra o absentismo

Nova mobilización en Santiago de Compostela con motivo do Día das Letras Galegas. Miles de persoas mobilizáronse na capital galega este domingo en defensa do galego e polo fin da “emerxencia lingüística” ao abeiro dunha convocatoria da plataforma Queremos Galego.

Baixo o lema O galego, lingua vital, arrancou este mediodía desde a Alameda compostelá e percorreu o centro da capital galega ata a Praza da Quintana, onde unha foliada puxo o broche final. Cun grupo de gaiteiros á cabeza e o bloque de Queremos Galego liderando, os participantes berraron consignas como “A Galiza, en galego” ou “Nas aulas de Galiza queremos galego“.

“A de hoxe será unha manifestación multitudinaria na que a sociedade galega amosará o seu compromiso coa lingua e a vontade de que se repoña en todos os ámbitos”, avisou o portavoz de Queremos Galego e presidente de A Mesa Pola Normalización Lingüística, Marcos Maceira.

En declaracións aos medios desde a Alameda, asegurou chegar cos “deberes feitos” grazas ao protocolo Lingua vital, unha “alternativa colectiva” que conta con máis de 300 medidas destinadas a “reverter a emerxencia lingüística” e que pretenden que a Xunta “copie”. Este foi un dos protagonistas da xornada, prestando o seu nome ao lema da marcha.

Case ás 13.00 horas, a Praza da Quintana, onde as consignas reivindicativas e a música non deixaron de soar, xa estaba chea. Desde o escenario, a organización chegou a falar dun “atasco” nos diferentes puntos de entrada. Alí, houbo outra protagonista: Begoña Caamaño, a xornalista e escritora homenaxeada este ano, falecida en 2014.

“Este 17 de maio é un pouco máis especial porque a persoa á que está dedicado tería estado aquí como unha máis”, asegurou a coordinadora de Queremos Galego, Celia Armas, que lembrou as críticas de Caamaño á “nefasta” política lingüística da Xunta. As palabras de Armas derivaron nun aplauso dos asistentes, que remataron ao berro de “Begoña Caamaño, patriota galega”.

Desde o escenario, chamou a “continuar a súa loita” e “a vivir todos os días en galego”: “A nosa lingua é tan válida como calquera outra”. Armas instou a que, ademais de manifestarse, se pode facer “moito” na vida diaria, con pequenos xestos como elixir o galego para xestións administrativas.

A Armas seguiuno Maceira no turno das intervencións, no que perfilou a “emerxencia lingüística” como froito de “restricións” en diversos ámbitos e acusou á Xunta de Galicia, a cargo do PP, de “incumprir o seu deber”. “Rueda está a tempo de rectificar e de deixar de ser o único presidente que renega da lingua do seu país”, instou.

BNG e Sumar, presentes

Ata a protesta acudiron representantes políticos, como a portavoz nacional do BNG, Ana Pontón, e o secretario xeral de Movemento Sumar Galicia, Paulo Carlos López. Durante a mobilización, ambas suxeitaron a mesma faixa de Queremos Galego.

Pontón, líder da oposición no Parlamento de Galicia, acusou o PP dun “acoso e derrubo” ao galego durante 17 anos, que provocou un “momento crítico” para a lingua. Así, tachou o plurilingüismo e reclamou un “cambio de rumbo”. “O galego non é unha carga”, reivindicou.

A nacionalista tamén acusou ao novo goberno de Lugo, liderado por Elena Candia (PP) tras unha moción de censura, de “cargarse as políticas de apoio ao galego, dicindo que son unha carga”. Do mesmo xeito, os representantes de Queremos Galego cargaron contra a “eliminación” do departamento de Promoción da Lingua.

Por outra banda, López reclamou ao ministro de Asuntos Exteriores, José Manuel Albares, que volva levar á Unión Europea a oficialidade do galego antes de que remate 2026. Ademais, pediu un “xiro radical” á Xunta, “principal responsable da situación do galego”.