O Goberno avanza outra batalla legal cos Franco por Meirás

O ministro de Política Territorial e Memoria Democrática avanza unha batalla legal cos Franco para evitar indemnizar á familia polo Pazo de Meirás. Ángel Víctor Torres asegurou nunha entrevista á Cadena Ser que loitarán contra a indemnización que o Tribunal Supremo concede aos herdeiros do ditador e pide a colaboración do “conxunto das administracións”. “Seguiremos defendendo os intereses públicos”, asegurou.

No seu análise da sentenza, coñecida esta semana, sinala que confirma que o ben pertence ao Estado, aínda que recoñece o dereito a indemnizar á familia que o ocupou durante anos. A cantidade establecerase cando se execute a sentenza, aínda que, en 2020, o avogado dos Franco cifroua nun mínimo de 800.000 euros. “É unha parte do fallo que vai ter percorrido xurídico porque o consultamos coa Avogacía do Estado. Díxonos que terá que ser trasladado á Audiencia Provincial da Coruña e xa veremos en que acaba”, apuntou o ministro.

Un “triunfo” do público

Cuestionado especificamente por se o Goberno recorrerá a sentenza, Torres insistiu no “percorrido” legal que lle trasladan que terá. Tamén afirmou: “Imos dar a batalla, e espero que sexa co conxunto das administracións, para que un uso privativo de alguén non teñamos que indemnizalo con cantidades económicas“. Neste sentido, asegurou que o seu departamento xa está en contacto cos servizos xurídicos de todas as administracións implicadas, ás que ademais agradeceu a súa implicación no proceso realizado ata agora.

En todo caso, o ministro valorou o fallo como “unha vitoria da defensa do público fronte ao privado e da democracia fronte ao totalitarismo”.

Abrir Meirás

En canto ao futuro deste ben, declarado recentemente como Lugar de Memoria Democrática, traballará con Patrimonio Nacional e da man do resto de administracións para acadar un “consenso” sobre o seu uso. O seu propósito é “que poida ser destinado ao ben xeral” que entre todos se poida “compartir”. Torres avanzou que agora arrinca un proceso para poder abrilo ao público e que sexa un ben que lembre “o que alí se facía e o que era”: “Debe ser visitado e debe ser invertido nel o que sexa necesario”.

Preguntado pola petición do BNG para que o Goberno transfira o monumento a Galicia, non quixo “adiantarse” á súa posición, xa que aínda non tiveron tempo de analizar e estudar a proposta.

Relación coa Xunta

Por outra banda, o titular de Política Territorial cualificou como “boa” a relación do Goberno con Alfonso Rueda: “Chegamos a máis acordos desde o 2019 ata hoxe que nos anos anteriores”. Ademais, cre que é “máis fácil” entenderse con el que con outros presidentes autonómicos, nos que ve unha “aversión permanente” que non atopou no galego.

Preguntado pola reclamación da Xunta para que se trasladen os preto de 200 expedientes do litoral restantes, asegurou que “cumprirá” co compromiso adquirido: “Eu fun presidente autonómico e tamén me queixei despois de asinar ese traspaso porque quería que todo fora máis rápido. Non é doado. Demoramos máis dun ano e aquí vai ocorrer igual. Non en que se tarde un ano, senón en que o faremos ben, con consenso e en colaboración coa Xunta”.