O PP galego celebra a inhabilitación de García Ortiz: «Ninguén está por riba da lei»
Paula Prado, secretaria xeral do PPdeG, considera que a condena do Tribunal Supremo repara "polo menos en parte" a "ferida institucional" ocasionada polo fiscal xeral do Estado pola revelación de segredos contra a parella de Isabel Díaz Ayuso.
A vicevoceira do grupo do PPdeG e secretaria xeral do PP galego, Paula Prado – PPDEG
Comentarios
A secretaria xeral do PP galego carga contra o fiscal xeral do Estado tras coñecerse a condena por parte do Tribunal Supremo. Paula Prado celebrou este venres a inhabilitación de Álvaro García Ortiz, por un delito de revelación de segredos contra Alberto González Amador -parella da presidenta madrileña, Isabel Díaz Ayuso– ao entender que se lanza “unha mensaxe contundente de que ninguén está por riba da lei por moito poder ou cargo que teña”.
A número dous do PPdeG comezou con esta manifestación a súa intervención no marco dun debate na Comisión de Peticións da Cámara galega, onde lamentou que se “arrastre tan baixo o prestixio dunha institución tan esencial para a democracia”. A súa xuízo, o modo de proceder do fiscal “minou a confianza pública” e agora a sentenza do Tribunal Supremo (TS) repara “polo menos en parte” a “ferida institucional” causada.
A continuación, Paula Prado argumentou que “máis lamentable” é “poñer en cuestión o labor da xustiza e instigar a teoría conspirativa do lawfare ao máis puro estilo totalitarista ou ditatorial con estándares afastados dos principios democráticos que tanto custou alcanzar” e que, ao seu modo de ver, “todos os partidos deberían non só preservar, senón defender”.
“Todos os partidos políticos que non somos antisistema, polo menos”, rematou, tras celebrar, en nome do Grupo Parlamentario Popular, o que interpreta como “unha vitoria clara da xustiza”.
