Os promotores inmobiliarios aplauden o plan da Xunta para rematar os ‘esqueletos’ do ladrillo: “Dá resultado”

As medidas postas en marcha pola Xunta para facilitar que edificacións sen rematar se reactiven “están a dar resultados”, segundo os promotores inmobiliarios de Galicia, que valoran que esta actuación permite, por unha banda, combatir o feísmo de estruturas inacabadas e, por outra, poñer a disposición vivenda pública.

En declaracións a Europa Press, o secretario xeral de Aproinco (promotores da provincia da Coruña) e representante tamén de Feproga (a federación galega), Juan José Yáñez, fala dunha “moi boa medida” e dunha “solución moi satisfactoria” que “está a dar resultados”.

Os esqueletos da burbulla do 2007

Pola súa banda, o coordinador da oficina de apoio á rehabilitación do Colexio de Arquitectos, Eduardo Alonso, sinala que “cada vez menos, porque xa van quedando menos, pero si, aínda hai moitos esqueletos das promocións abandonadas tras a burbulla que estalou en 2007”.

A federación galega de inmobiliarias (Fegein) cifraba estes edificios e promocións sen acabar en máis de 6.000 e poñía o foco en uns 1.700 propiedade da Sareb (o denominado ‘banco malo’, que xestiona activos inmobiliarios de bancos nacionalizados tras a crise financeira).

Tanto Alonso, desde o colexio de arquitectos, como Yáñez, dos promotores, apuntan ás “moitísimas implicacións” que deles se derivan, ao converterse en focos de “degradación” e tamén eventuais ocupacións.

Obstáculos “xurídicos”

O portavoz das promotoras advirte que a maior traba que presenta a reactivación é o problema “xurídico”, pois a empresa propietaria da promoción en cuestión en moitas ocasións foi liquidada. Unha vez resolto ese obstáculo chegan o negocio e a rendibilidade, segundo constata.

Pola súa banda, a presidenta da Asociación Galega de Inmobiliarias (Agalin), Emma Martínez, constata que a venda deste tipo de edificacións se reactivou desde que a Xunta deu cobertura legal e afirma que se nota sobre todo na costa.

Recuperar licenzas

En concreto, o Goberno galego aprobou, a través da lei de acompañamento aos orzamentos de 2025, un réxime excepcional aplicable ás edificacións non acabadas. Con el permite aos promotores recuperar as licenzas de obra de edificios que quedaron a medio construír e outorga un prazo de tres anos para finalizar as obras.

A Consellería de Vivenda, que aprofunda na norma na lei de acompañamento de 2026, carece de datos, pero resalta que “se recibiron e se seguen a recibir consultas para a aplicación da disposición que demostran o interese xerado”.

A Coruña e Lugo

O litoral coruñés, con promocións paralizadas en Miño, Oleiros, Mugardos, Ribeira… pero tamén o interior da provincia (Arteixo, Teo, Trazo) presenta exemplos de todo tipo destas construcións sen finalizar, algunhas reactivadas nos últimos meses.

A Mariña de Lugo e a costa de Ortegal son outros puntos nos que proliferaron este tipo de situacións, que as promotoras recuperan agora ao amparo das medidas administrativas para favorecer a eliminación dun elemento que daniña a paisaxe e ao mesmo tempo para que haxa máis vivenda pública dispoñible.

E é que os promotores poden solicitar unha licenza municipal para a completa terminación da edificación e para o seu destino a uso residencial, sempre que, como mínimo, o 50 por cento das vivendas teñan a condición de vivenda protexida.