Ábalos nega ter falado con Pardo de Vera para “enchufar” á súa exparella en Ineco

O exministro de Transportes José Luis Ábalos negou este luns durante a súa comparecencia no Tribunal Supremo no xuízo polo caso ‘mascarillas’ ter movido fíos coa entón presidenta de Adif, a galega Isabel Pardo de Vera, para que a súa exparella, Jessica Rodríguez, comezase a traballar en Ineco. “Nunca falei con Isabel sobre esta cuestión, xamais”. 

Así o apuntou en resposta ás preguntas do fiscal xefe de Anticorrupción, Alejandro Luzón, sinalando que no ámbito público “é o menos procedente” facer este tipo de chamadas.“Se unha persoa quere traballar, terá que pasar polos procesos que ten que pasar. É que paréceme de cajón”, engadiu.

Preguntado por se coñecía que Jessica non traballaba, o exministro declarou que “todo o contrario”, que iso é o que lle “sorprende” e que non fixo “o seguimento ata o final”.

Por outra banda, sobre Claudia Montes, outra muller vinculada a Ábalos e que traballou en Logirail, unha empresa dependente de Renfe, o acusado manifestou que a súa relación era “igual que con 200.000 afiliados do PSOE”.

“Eu a esta muller vína unha vez que me pediu unha foto na rúa, entrando nun acto político. E logo outra vez, nunha ocasión que veu porque está facendo un curso de formación e quixo vir aquí ao ministro a dicirlle o contenta que estaba”, contou, para negar que tivese con ela unha relación: “Ningún roce de nada”.

Neste sentido, lamentou que o caso de Montes puxo de manifesto “toda a miseria deste proceso”, e indicou que se trata, ao seu xuízo, dun “caso claramente mediático, xulgado hai tempo con condena clara”.

“Coaccións” á súa exparella 

Así mesmo, Ábalos declarou como acusado este luns no Tribunal Supremo que coñeceu á súa exparella Jessica Rodríguez a través do empresario acusado, Víctor de Aldama, a pesar de que ambos o negaron, motivo polo cal considera que houbo coaccións: “Ela non di iso se non a tiveron coaccionada”.

“Dixo que cobraba sen ir traballar, sen que ninguén lle preguntase por iso, e que elixira o apartamento. ¿Alguén lle preguntou por iso? Díxoo de ‘motu proprio’. E dixo que non coñecía a Aldama, cando eu a coñecín por el”, expresou no Salón de Plenos.

O exministro indicou que coñeceu á súa exparella nun piso da rúa de Atocha vinculado a un socio de Aldama nunha cea na que estaban o exministro, o empresario, o exasesor ministerial Koldo García —tamén acusado—, Jessica e unha amiga dela.

Despois da súa ruptura, que cualificou como “moi brusca”, Ábalos sinalou que non volveron falar: “Alí descubrín a palabra ‘ghosting’, porque foi efectivamente así”.

O exministro lamentou que a relación “non podía permanecer porque foi unha relación extramatrimonial” e enfrontábanse ao “risco dun escándalo público”, ao tempo que criticou que a súa intimidade estea “tan reventada”: “Xa son un personaxe, son carne de meme”.

Do mesmo xeito, sinalou que “ninguén di que non vai traballar cando se preocupou de fichar todos os días”, tanto no “tempo que estivo en Ineco, como o que estivo en Tragsatec”.

Acceso ao piso da Praza de España 

O exministro manifestou que coñeceu a Alberto Escolano, socio de Aldama, a través de Koldo porque este axudáralle como empresario, “montándolle reunións coa delegación do Goberno en Aragón ou co Concello de Calatayud”.

Ábalos enmarcou nesta relación o feito de que o socio de Aldama fose quen pagase o piso no que vivía Jessica na céntrica Praza de España en Madrid, algo que lle constaba, aínda que non así a relación de Escolano co empresario.

E asegurou que estivo no piso “en ocasións, despois de comer”, e logo volvía ao Ministerio porque a súa axenda era “tremenda”. Nesta liña, dixo que “nunca” tivo chaves do apartamento e que “nunca” pasou unha noite alí.

Ademais, recoñeceu que recibiu unha mensaxe de Jessica cando xa deixaran a relación para dicirlle que se deixara de pagar o piso.

“Eu non tiña ningún compromiso, non era unha persoa dependente, foi independente toda a vida, eu coñecina independente e polo tanto eu non teño ningunha obriga”, explicou.