Rueda abraza a eólica mariña e ve «plena compatibilidade» coa pesca e o marisqueo
Alfonso Rueda mantivo unha reunión co presidente e o conselleiro delegado de Amper na cal trasladou o "compromiso" da Xunta coa produción de enerxía renovable.
O presidente da Xunta, Alfonso Rueda, e a conselleira de Economía, María Jesús Lorenzana, durante a súa reunión co presidente de Amper, Pedro Morenés, e o conselleiro delegado da compañía, Enrique López / Xunta
Comentarios
O presidente da Xunta pasa revista á eólica mariña. Alfonso Rueda e a conselleira de Economía e Industria, María Jesús Lorenzana, mantiveron este domingo unha reunión co presidente do Grupo Amper, o exministro Pedro Morenés, e o conselleiro delegado da empresa, Enrique López.
Durante o encontro, Rueda reivindicou o “potencial” de Galicia para desenvolver enerxía eólica mariña, especialmente a eólica flotante, garantindo a “plena compatibilidade” coa pesca e o marisqueo. Ademais, o mandatario autonómico trasladou tamén o “compromiso” da Xunta coa produción de enerxía renovable e a descarbonización, dados os factores xeográficos, meteorolóxicos, oceanográficos e industriais da comunidade.
Neste senso, Rueda manifestou a intención do seu Executivo de estar na “primeira poxa” que se convoque a nivel nacional para implantar parques eólicos mariños.
Amper conta en Galicia coas filiais Elinsa, que promove unha nova planta no polígono de Morás e Offshore Windwaves, que promove unha factoría en Ferrol tamén dedicada ao negocio da eólica mariña.
Alianza con Países Baixos pola industria e o turismo
En paralelo, Rueda mantivo esta semana un encontro co embaixador dos Países Baixos en España, Roel Nieuwenkamp, no que abordaron posibles alianzas entre ambos territorios en ámbitos como a industria e o turismo.
Na reunión, o presidente autonómico destacou que a comunidade conta cun ecosistema competitivo en sectores como a automoción, as enerxías renovables, a biotecnoloxía e a economía marítima. Así mesmo, resaltou a “importancia” de potenciar contactos entre empresas, portos, universidades e centros tecnolóxicos, entre outros.
Nesta liña, tamén se sinalou a oportunidade que supón o Xacobeo 2027 para seguir impulsando o turismo cara Galicia, que espertou un “interese crecente” nos Países Baixos. De feito, en 2025 expidíronse 6.745 compostelas a peregrinos neerlandeses, un 3 % máis que en 2024.
