Rueda apoia a proposta de Barbón de investigar conxuntamente as causas dos incendios.

O presidente da Xunta defendeu seguir “colaborando” co Goberno asturiano en beneficio de dúas comunidades “veciñas e irmás” e considerou “moi oportuno” o planteamento do presidente asturiano, Adrián Barbón, respecto a analizar conxuntamente as causas dos incendios.

“Eu creo que o presidente Barbón o dicía e nós estamos absolutamente de acordo, debemos ver conxuntamente cales poden ser as causas dos incendios, despois, cada lugar ten as súas particularidades, pero é verdade que en toda esta zona de España os incendios prodúcense de maneira repetida, onde temos características moi parecidas no medio rural, creo que traballar xuntos para analizar e despois tomar decisións está ben e esa oferta que fixo o presidente Barbón a min paréceme moi oportuna”.

Así o destacou este domingo Alfonso Rueda en declaracións aos medios tras inaugurar un cruceiro galego doado pola Asociación Día de Galicia en Asturias situado en Villa Magdalena. Alí estiveron tamén o alcalde de Oviedo, Alfredo Canteli e o presidente do PP de Asturias, Álvaro Queipo.

Rueda insistiu en que a colaboración e o entendemento entre Asturias e Galicia é un bo exemplo e polo tanto debe seguir sendo así.

“Efectivamente temos diferentes planteamentos, diferentes formas de ver as cousas, somos de partidos políticos diferentes, pero creo que ao final, como todos queremos solucionar e todos estamos na vida pública para intentar buscar solucións, moitas veces coincidimos e creo que é un bo exemplo de que creo que é o mellor símbolo de como se poden facer as cousas colaborando e facelas ben”, dixo.

Colaboración con Asturias

Neste sentido asegurou que Galicia ten os brazos abertos para seguir facendo moitas cousas con Asturias. Referiuse por exemplo á defensa do Corredor Atlántico ou a xestión do turismo.

Unha colaboración que foi tamén resaltada e posta en valor por parte do presidente dos ‘populares’ asturianos, Álvaro Queipo, que incidiu en que o galego e o asturiano son dous pobos irmáns, que teñen “moitísimos lazos en común, e que desde logo teñen que seguir traballando para que sexan cada vez máis fortes”.

“Compartimos moitos intereses, temos moitas cuestións que son comúns, como por exemplo o tema da financiación autonómica, onde Galicia e Asturias teñen que ir da man, e eu álegrame de que o fagan”, dixo Queipo que engadiu que “non cre que o feito de que haxa dous gobernos de distinta cor teña que ser impedimento para non poder facer políticas e accións conxuntas que beneficien aos cidadáns de ambas comunidades autónomas”.