Rueda asegura que “todo se reduce a política” na exclusión de Altri da planificación eléctrica.

Explicou con claridade o presidente da Xunta sobre a exclusión de Altri da planificación eléctrica. Alfonso Rueda referiuse este venres á non incorporación do proxecto do grupo luso dentro da planificación da rede eléctrica 2025-2030, e criticou que esa decisión prexudica a toda a provincia de Lugo, ao mesmo tempo que lamentou que “todo se reduce a política”. Así o trasladou durante a súa intervención nun foro coloquio organizado en Vigo pola Asociación Clúster de Empresas de Enxeñería, Consultoría e Servizos Tecnolóxicos de Galicia, Ageinco, onde apuntou que a noticia que chega desde o Goberno respecto a esa planificación eléctrica foi “agridoce”.

Segundo indicou, “non hai tan malas noticias en tres provincias”, en alusión aos reforzos de conexión eléctrica plantexados para varias áreas de Galicia, pero criticou que “por negarlle a conexión a unha empresa concreta”, en alusión a Altri, o Goberno “deixa sen conexión a toda unha provincia”.

Negación preventiva

“Iso non o entende ninguén”, subliñou, na mesma liña que xa manifestou a conselleira de Economía e Industria, María Jesús Lorenzana, tras a reunión co secretario de Estado de Enerxía esta mesma semana.

Alfonso Rueda afirmou que a planificación eléctrica, abordada desde o punto de vista das conexións que necesitan as empresas para instalarse ou ampliar a súa actividade, é “o gran problema de España agora mesmo”, e lamentou que as decisións se leven ao “terreo da política”.

“Aquí todo o mundo sabe que hai unha serie de planteamentos, que van dicir non de forma preventiva, e esa forma preventiva convértese en permanente. Hai tanta oposición para facer cousas que xa non se pode facer nada”, explicou, e reiterou que, o que non se faga en Galicia, “farase noutro sitio”, antes de insistir en que a Xunta é a “primeira interesada” en non facer “ningún desatino” que poida derivar en responsabilidades, incluso penais, e en ser “rigorosa”.

Posicións profesionais

Segundo o presidente da Xunta, os proxectos e o interese dos investidores enfróntase “a unha serie de correntes contrarias” e aproveitou o encontro con Ageinco para reclamar ás organizacións profesionais que reivindiquen eses proxectos. “Bótase de menos unha visión profesional que diga ‘se isto se pode facer, queremos que se faga’, porque isto é traballo”, apuntou.

Rueda lamentou que, “ao final, todo vai ao terreo da política, de plataformas que teñen moito de política, que se opoñen se a Administración di ‘si’, e todo se reduce ao terreo político de ter que discutir con esas plataformas”.

Respecto diso, o presidente galego asegurou que, na súa recente visita a Xapón, os investidores trasladaron á conselleira María Jesús Lorenzana, que non entenden por que se nega a conexión eléctrica a Altri “se cumpre” ou por que proxectos incluídos en PERTEs millonarios aínda non empezaron a súa tramitación ambiental.