Rueda descarta o nivel 3 de emerxencia e activará a próxima semana as axudas aos afectados polos incendios.

O presidente da Xunta marca como prioridade as axudas ás zonas afectadas polos incendios. Alfonso Rueda avanzou este luns que a próxima semana haberá unha reunión extraordinaria do Consello da Xunta, que se celebrará en Ourense, para habilitar as primeiras axudas destinadas a zonas afectadas polos incendios en Galicia e reclamou ao Goberno a incorporación inmediata dos efectivos “solicitados e comprometidos”.

“Non poden chegar a conta gotas. Agradecemos o que xa chegou e esperamos que chegue hoxe mesmo o comprometido”, defendeu Rueda na comparecencia de prensa despois da primeira reunión para estudar. O presidente galego recalca que permanecen “aínda moitas hectáreas ardendo”, polo que non se pode facer unha estimación da cuantía. O que si prometeu é que a Xunta “estará á altura” e pediu a todas as administracións a mesma “celeridade”.

Así, detallou que a Axencia Galega de Emerxencias (Axega) realizará a avaliación dos danos para que as diferentes consellerías poidan proceder a facer as súas convocatorias e aprobadas no Consello previsto a próxima semana para “que se abra o prazo de petición”.

En paralelo, Rueda manifestou que “non é necesario” que o Goberno galego solicite o nivel 3 de emerxencia porque, segundo destacou, non achegaría máis medios. “Se o nivel 3 supuxera máis achega de medios e fose necesario para que se achegasen eses medios, eu non tería ningunha dúbida, pero non é necesario. Ontem mesmo o presidente do Goberno dicía que vai atender todas ás solicitudes; estamos no nivel 2, así que sería incomprensible que se estivesen reservando medios”, expuxo.