Rueda levará ao debate sobre o estado da autonomía medidas sobre vivenda, protección social e fiscalidade
O presidente da Xunta afirma que unha parte do seu discurso, á que el lle concede "moita importancia", consistirá en facer balance do realizado nos dous primeiros anos deste mandato.
Rueda, durante o Consello da Xunta. – Xunta de Galicia
Comentarios
O acceso á vivenda será un dos temas sobre os que pivotará o discurso do presidente da Xunta, Alfonso Rueda, no debate sobre o estado da autonomía que se celebrará esta semana no Parlamento de Galicia, ao que se sumarán outras propostas como a ampliación de coberturas de carácter social ou máis rebaixas fiscais.
Así se pronunciou este luns na rolda de prensa posterior ao Consello da Xunta, onde esgrimiu que hai unha parte do seu discurso, á que el concede “moita importancia”, que consistirá en facer balance do feito nos dous primeiros anos deste mandato.
“Faino cos recursos dos galegos e serve para constatar que ao que nos comprometemos facémolo. E que se algunha cousa non se pode facer tamén somos responsables diso e hai que explicar cales son as circunstancias”, esgrimiu.
Seguidamente, destacou que hai medidas en marcha que é preciso “completar” e que avanzará no debate de política xeral, no que tamén prevé introducir “novidades derivadas do devir diario e das circunstancias que van aparecendo, de novos problemas que hai que solucionar”. Así, as políticas de vivenda, ás que xa outorga a cualificación de “tema central” da lexislatura, serán “eixe” do seu discurso.
“Hai cousas que cumprir en materia de vivenda, novas cousas que aportar, cuestións que agora mesmo están de actualidade e que son moi necesarias porque se poden converter en problemas e xa están a afectar á nosa produtividade”, esgrimiu.
“Queremos actuar sobre iso e tamén seguir insistindo en facer todo o posible para ampliar as coberturas de carácter social. Tamén temas fiscais, de rebaixas. Queremos seguir, xa saben o que digo sempre, que a nosa intención non é subir impostos cando podemos baixalos”, engadiu.
Máis de medio cento de propostas “cumpridas”
Alén diso, Rueda reivindicou a “normalidade institucional” que supón que sexa o segundo ano do mandato no que se celebra este debate autonómico de política xeral –en 2024 non houbo, dado que foron as eleccións autonómicas e plantexou o seu plan de mandato durante a investidura–, ao igual que a aprobación das contas galegas.
Tamén insistiu en que renderá contas e destacou que “o nivel de cumprimento” do máis de medio cento de propostas aprobadas na anterior cita –moitas delas poñen o foco en demandas ao Executivo central– é “do 85%. “E aínda quedan dous anos de lexislatura”, apostilou.
Sobre as críticas da oposición, replicou que “está no seu dereito e no seu papel de facer crítica”. “Sempre as fai normalmente, sen coñecer as propostas. Pero xa lle gustaría ao BNG ter o mesmo nivel de cumprimento no programa polo que apoiou a investidura de Pedro Sánchez e que está todo sen facer a día de hoxe”, rematou.
