Rueda nega compensacións a Altri e abre a porta a unha nova conexión eléctrica
O presidente da Xunta considera "inviable" o proxecto ante o 'portazo' do Goberno para incluílo na planificación eléctrica 2025-30 e asegura que «non hai ningún tipo de compensación prevista» no memorando asinado coa empresa portuguesa.
O presidente da Xunta, Alfonso Rueda, comparece ante os medios. – ANA VARELA
Comentarios
Alfonso Rueda recalca que Altri non recibirá ningún tipo de compensación a pesar do arquivo do seu expediente. O presidente da Xunta asegurou que o proxecto presentado pola empresa portuguesa «decae», toda vez que a negativa do Goberno a incluílo na planificación eléctrica 2025-30 fai “inviable” a súa autorización ambiental integrada e, en consecuencia, que avance na súa fase de tramitación.
Durante a súa intervención posterior ao Consello da Xunta, Rueda lembrou que aínda existe un prazo de tres meses para que a empresa presente alegacións e precisou que «non hai ningún tipo de compensación prevista».
O mandatario autonómico afirmou coñecer o contido do memorando -que non se fixo público por ter “carácter de confidencialidade”-, asinado na súa día con Greenfiber, a promotora do proxecto, pero, segundo o seu relato, neste documento non figura o pago de ningún tipo de compensación.
Do mesmo xeito, afirmou que, no caso de que a empresa lograse acreditar que “hai unha nova conexión eléctrica diferente á que se plantexaba e que o Goberno central dixo que era imposible”, teríase que “volver empezar” como “novo expediente”.
