Rueda reforza a aposta pola vivenda pública e anuncia unha ampliación de capital en Recursos de Galicia
A Xunta reservará o 30% da vivenda pública en venda a persoas de entre 36 e 45 anos, con especial preferencia para as familias con fillos pequenos, e elevará o límite máximo de renda para acceder a unha residencia de protección oficial.
Alfonso Rueda, no debate de investidura como presidente da Xunta
Comentarios
Máis vivenda e máis enerxía. Alfonso Rueda arrancou o Debate sobre o Estado da Autonomía reafirmando algunhas das apostas que marcaron a primeira metade do seu mandato e que o dirixente autonómico tiña marcadas en vermello desde a súa chegada a San Caetano. Na súa intervención no Parlamento galego, precisamente, reivindicou que cumpriu “o 85% das medidas” que anunciou cando tomou posesión, e unha parte importante destas pasaba por reactivar a construción de vivenda pública tras máis dunha década de parálise. Rueda afirmou que as 4.000 novas residencias que prometeu para duplicar o parque público xa están en marcha, e tamén os Proxectos de Interese Autonómico para desbloquear solo onde erguer outras 20.000 vivendas.
Foi nesta área, a do acceso á vivenda, na que o presidente da Xunta realizou os primeiros anuncios da xornada. O Goberno galego, segundo avanzou, reservará o 30% das vivendas públicas en venda a persoas de entre 36 e 45 anos e elevará o límite máximo de renda para acceder a elas ata catro veces o IPREM, o que significa, segundo explicou Rueda, que unha parella con un fillo que ata o momento tiña un teito de ingresos de 2.250 euros brutos mensuais, agora pasa a máis de 3.500 euros.
“Facemos isto porque cremos que a vivenda pública e protexida debe estar ao alcance de cantas máis persoas mellor”, dixo o dirixente pontevedrés.
Ampliación de capital en Recursos de Galicia
Rueda tamén avanzou que nas próximas semanas a Xunta impulsará unha ampliación de capital en Recursos de Galicia, a utility creada polo Goberno galego para participar en proxectos que aproveitan os recursos naturais do territorio para garantir un impacto social positivo, por exemplo, mediante rebaixas na factura da luz que compensen o impacto pola proximidade dun parque eólico. Na utility participan 32 empresas que, a priori, deberían acompañar á Xunta na ampliación de capital, cuxo importe non detallou Rueda. Entre elas están Abanca, Finsa, Megasa, Gadisa, Copasa, Jealsa ou Ence, entre outras.
Rueda mostrouse convencido de que o desenvolvemento das renovables ten que vir acompañado de beneficios directos para os lugares nos que se instalen, para o que a Xunta aposta pola “fórmula pioneira” de Recursos de Galicia, que dixo que tomaba como referencia modelos de Noruega. Tamén puxo en valor os descontos do 80% na factura da luz cos que contará medio milleiro de fogares da Mariña e vinculou a ampliación de capital a perseverar neses retornos económicos con novos descontos nas facturas.
