Rueda saca peito da redución do ratio de débeda: «Galicia non necesita unha condonación»
O presidente da Xunta destaca a redución do índice de débeda sobre o PIB, reducíndose ata o 13,9% e conseguindo o obxectivo fixado para 2029 de estar por debaixo do 14% catro anos antes.
Imaxe de arquivo dunha reunión do Consello da Xunta
Comentarios
O presidente da Xunta, Alfonso Rueda, destacou o bo desempeño orzamentario e o nivel moderado de débeda da comunidade que levou ás axencias de cualificación S&P e Moody’s a mellorar en 2025 as súas avaliacións da calidade crediticia da Comunidade (A+ e A3). Isto tradúcese nunha baixada do índice de débeda sobre o PIB, de 0,7 puntos nun ano, reducíndose ata o 13,9%.
Estes datos recóllense nun informe presentado pola Consellería de Facenda e Administración Pública relativo ao avance de peche do exercicio do pasado ano. Na rolda de prensa posterior ao Consello, o mandatario galego subliñou que a comunidade non necesita unha condonación da débeda e “consegue ese obxectivo fixado para 2029 de estar por debaixo do 14% catro anos antes”.
A redución conseguida mellora a estimación prevista no Plan Estratéxico de Galicia 2030 para este exercicio, que era dun 16,0%. Desde a Xunta destacaron que en cinco anos reduciron un 29% a ratio de débeda sobre o PIB.
Por último, Galicia segue a ser, un ano máis, un referente entre as comunidades que máis rápido pagan aos seus provedores, situando a media anual ata novembro do 2025 (último mes con datos publicados) nos “15,3 días, case 11 menos que a media estatal (26,1 días)”.
Con todo iso, o presidente galego destacou que o seu Executivo pechou o ano 2025 cun “saldo fiscal positivo do 0,11 % do PIB, mellorando as previsións iniciais”, nas que se contemplaba un obxectivo de déficit cero, obtendo unha capacidade de financiamento de 96 millóns de euros e executando o 97,4 % do orzamentado.
Esforzo inversor e execución orzamentaria
O informe presentado por Facenda destaca a execución dos gastos correntes, vinculados principalmente aos servizos públicos -sanidade, educación e servizos sociais-, que chegou ao 106% dos créditos iniciais, aumentando en 555 millóns de euros. Reflicte, tamén, a boa execución do orzamento, que se sitúa no 97,4% -o resto son fondos europeos que se executan en varias anualidades-, e dos fondos propios, que chega ao 101 % dos créditos iniciais.
O esforzo inversor da Xunta, tal e como detallou o presidente, consegue o 14,6% e a aforro bruto os 1.359 millóns de euros, “o que permite financiar maiores investimentos sen necesidade de acudir ao endebedamento”. A solvencia financeira de Galicia fai posible reforzar “a prestación de servizos de carácter social”, apuntou; isto é, o gasto en sanidade, en educación, en políticas sociais, en vivenda e en I+D+I, ademais de seguir entre as comunidades autónomas máis inversoras.
En canto aos ingresos, conseguen unha execución do 98,8%, destacando os tributarios, que medran un 6%, cunha recadación de 8.371 millóns de euros. Ingresáronse 348,5 millóns máis que no ano 2024. No caso dos ingresos correntes, a súa execución elevouse ata o 101,7%, cun bo comportamento en todos os capítulos. Os datos, conforme indicou a Xunta, confirman a prudencia coa que se elaboran as contas autonómicas e a solvencia dos seus resultados.
