O PP de Lugo presiona ao BNG para que abandone a Deputación mentres Tomé siga «exercendo de presidente»

• A Xunta carga contra a alcaldesa da Coruña polos alugueiros e pídelle que non siga «o programa de Sánchez»
• Besteiro admite que coñeceu «por terceiros» unha acusación de acoso contra Tomé.

Elena Candia, presidenta provincial do Partido Popular de Lugo criticou ao BNG por seguir no Goberno da Deputación, do que forman parte xunto ao PSdeG, mentres José Tomé “segue exercendo de presidente”. “Ten a posibilidade de zanxar isto en minutos”, presionou.

Candia compareceu ante os medios este sábado, horas despois de que, na tarde do venres, o secretario xeral do PSdeG, José Gómez Besteiro, asegurase que coñeceu “por unha terceira persoa” en outubro un suposto caso de acoso contra o que era presidente da Deputación de Lugo; aínda que dixo descoñecer se se trata do mesmo que figura na denuncia recibida no canal interno antiacoso habilitado polo PSOE.

A presidenta do PP provincial afeou que o venres se celebrase “con normalidade” a xunta de goberno local, da que o BNG se ausentou ao coñecerse que estaría presidida por Tomé. No mesmo día, este formalizou a súa renuncia ao cargo, que deberá ser aceptada en pleno o 30 de decembro. Pero non será ata a sesión do 14 de xaneiro cando se elixa ao seu sucesor no cargo.

“A pesar de que sabemos que o Partido Socialista tiña moita máis información, realmente o cambio que se produciu foi moi pouco. Non hai realmente un cambio. José Tomé segue co acta da Deputación e segue exercendo como presidente en funcións”, criticou.

Desto xeito, Candia pide ao PSdeG “abandonar episodios de contradición” en canto á información transmitida e esixe “claridade”. “Hai máis persoas que non nos contaron todo”, engadiu a popular, que urxe a Lara Méndez, Pilar García Porto e a dirección socialista aclarar que sabían e “por que calaron”.

Un exercicio de “coherencia”

Por outra banda, Candia considera que “non chega” con abandonar a presidencia da Deputación e “continuar mantendo o poder na sombra”. Neste sentido, centrou a súa atención no BNG: “Segue no goberno. Enfádase un pouco fóra, pero mostra a súa incoherencia e falta de contundencia na defensa de moitas cousas”.

A presidenta do PP provincial pide á formación que decida “se vai seguir sostenendo, directa ou indirectamente, un goberno condicionado por unha persoa apartada do PSOE por presunto acoso sexual”.

Así, apuntou que non será “ata o 14 de xaneiro” –día no que se votará ao novo presidente– cando se “corrixa esa situación”: “O BNG pode provocar iso mañá”. “Retirar o apoio ao goberno entendemos que non é un exercicio de radicalidade, é un exercicio de coherencia”.