O PSOE galego arrinca a carreira ás municipais coa incógnita de Santiago
O PSdeG reunirá o próximo fin de semana o seu Comité Nacional co obxectivo de poñer en marcha o calendario de elección de candidatos para os comicios locais, que terán lugar en maio.
O secretario xeral do PSdeG, José Ramón Gómez Besteiro, en rolda de prensa / PSdeG
Comentarios
O PSdeG prevé reunir o próximo fin de semana o seu Comité Nacional co obxectivo de poñer en marcha o calendario de elección de candidatos para os comicios locais, que se celebrarán en maio do próximo ano. A reunión do máximo órgano de decisión entre congresos celebrarase previsiblemente na xornada do sábado en Santiago, unha semana despois de que o PSOE reunise o seu comité federal. Ese encontro abrirá o proceso de primarias naqueles municipios onde haxa máis dun candidato.
As cabezas de cartel nas cidades teñen algúns nomes claros, como Abel Caballero en Vigo, que competirá por un sexto mandato; ou Inés Rey na Coruña, que intentará encadear o terceiro. O regulamento interno do Partido Socialista contempla que sexa decisión dos alcaldes optar á reelección, de forma que só se celebren primarias nos casos nos que así o esixa máis da metade da agrupación local.
En Lugo, o propio Besteiro mostrouse convencido de que o exalcalde Miguel Fernández volvería á Alcaldía en 2027 tras a moción de censura impulsada pola popular Elena Candia; mentres que se prevé que Iván Puentes volva aspirar a ser o candidato en Pontevedra, ao igual que Natalia González en Ourense. Os tres terían que someterse a primarias se houbera algunha outra candidatura, un proceso interno que si haberá en Ferrol, onde a exconcelleira Eva Martínez Montero avanzou a súa intención de competir co actual portavoz local, Ángel Mato, para ser o alcaldable socialista.
Dúbidas na capital galega
O escenario é máis incerto en Santiago, onde ningún militante deu por agora un paso adiante para encabezar a candidatura socialista. A agrupación local encargou unha enquisa na que se interesa pola opinión dos veciños sobre ata cinco militantes: o delegado do Goberno, Pedro Blanco; a deputada autonómica Patricia Iglesias; o secretario xeral da agrupación local, Aitor Bouza; o exministro de Sanidade, José Miñones; e a vicesecretaria local, Marta Álvarez Santullano.
O propio Aitor Bouza trasladou en rolda de prensa que, independentemente do que indique esta enquisa, da que esperan ter o resultado nos próximos días, será a militancia a que decida. Recentemente, os concelleiros non adscritos liderados por Mercedes Rosón anunciaran que presentarán a súa propia candidatura ás municipais.
Monforte, Barbadás e O Carballiño
Outros puntos nos que está por ver que decisións toma o partido son os concellos de Monforte, Barbadás e O Carballiño, nos que os socialistas xa non ostentan a alcaldía por diferentes motivos. No caso de Monforte, o actual alcalde, José Tomé, deixou a presidencia da Deputación de Lugo e as siglas socialistas tras ser denunciado por presunto acoso sexual a través do canal interno habilitado para iso polo PSOE. Unha denuncia que posteriormente acabaría tamén nos xulgados. Tomé segue gobernando Monforte como non adscrito pero co apoio do resto de concelleiros do Partido Socialista.
En medio da crise polo caso Tomé tamén foi apartado do PSOE o alcalde de Barbadás, Xosé Carlos Valcárcel, tras recibir o partido unha denuncia interna a través da que unha das concelleiras socialistas do Concello o denunciaba por suposto acoso laboral en represalia por ter denunciado por acoso sexual a outro edil, xa fóra da corporación.
Por último, en O Carballiño, o PSOE expulsou ao rexedor socialista Francisco Fúmega por chegar a un pacto de goberno co PP a pesar de non estar autorizado.
