Unha protesta multitudinaria pide en Ferrol un «tren do século XXI»

Miles de persoas reclamaron este domingo en Ferrol un servizo ferroviario “digno” ante o que consideran unha “discriminación” das comarcas de Ferrolterra, Eume e Ortegal nas políticas de modernización do transporte. A marcha, convocada polo Foro Cidadán Polo Ferrocarril, partiu ás 12:00 horas desde a estación de tren e culminou na praza de Armas, ante o Concello. A organización cifra a asistencia en 30.000 persoas –a Policía Local redúcea a 10.000–, entre as que estiveron o líder do PSdeG, José Ramón Gómez Besteiro; e o deputado do BNG no Congreso, Néstor Rego.

O acto central celebrouse no balcón do Concello, onde o manifesto foi lido pola produtora e directora cinematográfica Chelo Loureiro e o excapitán do equipo de baloncesto OAR Ferrol, Miguel Loureiro, na presenza de alcaldes de todos os partidos políticos da zona. O texto, que constitúe unha “declaración institucional por un tren do Século XXI”, comezou lamentando que a cidadanía está reclamando o seu dereito a non ser “permanentemente excluídas da modernización do transporte ferroviario ambiental e socialmente sostible“.

Marginados por sistema

O Foro realizou un diagnóstico da situación actual, sinalando que Ferrol está excluído do Eixe Atlántico Ferroviario de alta velocidade e que a comarca foi “sistematicamente marginada” nas inversións ferroviarias importantes de Galicia. Entre os puntos máis críticos, detallouse a liña Ferrol-A Coruña, xa que o tramo Ferrol-Betanzos Infesta foi construído entre 1909 e 1913, o que supón un trazado de 112 anos de antigüidade. Posúe curvas de radio pequeno, está “sen electrificar” e mantén “travesas de madeira”, o que o converte nun trazado “decimonónico” con tempos de viaxe “non competitivos”.

Sobre a conexión con Madrid, recordouse que desde o pasado mes de xuño eliminouse a conexión directa a Madrid, o que illa aínda máis á zona. En canto á liña de Ancho Métrico, a antiga FEVE, entre Ferrol e Ribadeo, sofre unha “falta de investimento en infraestrutura” e un material rodante “escasamente fiable, con avarías constantes” e frecuencias escasas, cunha “deterioración paulatina ano tras ano”. Sobre o Corredor Atlántico, as conexións portuarias de Ferrol non están integradas no Corredor Atlántico Europeo de Mercadorías, o que o desenvolvemento económico da comarca. “Ferrol é a única das sete cidades galegas sen plan para a chegada de alta velocidade“, sentenciou o manifesto.

Por outra banda, Miguel Loureiro, foi o encargado de poñer sobre a mesa unha lista de nove peticións conxuntas á Xunta e ao Goberno central, entre as que destaca a necesidade de recuperar servizos perdidos e planificar infraestruturas de futuro, ademais de recuperar a relación directa con Madrid e incrementar as frecuencias entre Ferrol e A Coruña para que sexan competitivas.

Cercanías Ferrol-A Coruña

Tamén solicitan a creación dun servizo de Cercanías entre Ferrol e A Coruña, un espazo urbano onde residen máis de 600.000 persoas, así como resolver en 2025 as alegacións ao proxecto de construción do bypass de Betanzos-Infesta e iniciar a redacción do proxecto. Ademais, piden asegurar a intermodalidade dos transportes, coa firma do convenio para a estación, e instan á Xunta de Galicia a solicitar o traspaso de competencias dos servizos de viaxeiros por ferrocarril, así como impulsar as actuacións para garantir a chegada efectiva da Alta Velocidade a Ferrol e Lugo.

Os convocantes concluíron que o impacto da exclusión ferroviaria vai máis aló do transporte de viaxeiros e afecta á mobilidade de mercadorías, o desenvolvemento económico e a competitividade dunha comarca que xa sufriu historicamente a “marginación” inversora.