Amper muda o chip e considera sair do porto exterior de Ferrol para deixar espaço à SAIC

O plano da SAIC para estabelecer na Galiza o seu primeiro centro industrial e loxístico en Europa deve superar varios marcos para chegar a bo porto. Un deles é que o Consello de Ministros dea luz verde á autorización de investimento estranxeiro para mobilizar os 200 millóns que require na súa primeira fase o proxecto. Outro, que a Autoridade Portuaria de Ferrol, co seu novo presidente José Antonio Álvarez Vidal á fronte, lle outorgue a concesión dos terreos no porto exterior para a construción da fábrica de compoñentes e montaxe de vehículos na que espera producir 120.000 coches anuais a partir de 2028. Este último requisito esixirá que algunhas das empresas con concesións na dársena deixen sitio ao grupo chinés, que quere arrancar as obras durante o ano que vén.

Un dos terreos que prevé ocupar a SAIC está actualmente en mans de Amper, que en 2022 logrou unha concesión por 30 anos de 65.000 metros cadrados, a C-995- coa súa filial Nervion Naval Offshore para a construción dunha planta de montaxe de estruturas de eólica mariña. Inicialmente, o grupo dixo que estaría operativa no segundo semestre de 2023, aínda que no último Investors Day, celebrado o pasado abril, trasladou aos investidores que o proxecto estaba en marcha coa expectativa de operar en 2027, coa expectativa dun repunte nos contratos de eólica offshore a partir de 2028.

O grupo que preside Pedro Morenés, exministro de Defensa durante a etapa de Mariano Rajoy en Moncloa, explicou a este medio que “está en disposición de colaborar coa Xunta” e que “non será impedimento para a chegada de proxectos industriais a Ferrol”, sinalou un portavoz da compañía. Matizou, con todo, que non recibira comunicación oficial algunha, por agora, do Goberno galego ou do Porto de Ferrol respecto á concesión.

Esta posición é diferente á que mantía Amper unhas semanas atrás, cando se coñeceu o interese da SAIC por ocupar eses terreos, pois sinalaba entón que continuaba adiante co seu proxecto de eólica mariña no porto exterior ártabro. A compañía que dirixe Enrique López é unha gran contratista do sector da defensa, pois ten participación en oito dos Programas Especiais de Modernización, seis liderados por Navantia e dous por Airbus. Ademais, leva tempo sendo un dos socios habituais do grupo naval público no desenvolvemento de compoñentes para eólica mariña.

Amper rexeita incumprimentos

A conselleira de Economía, María Jesús Lorenzana, dixo o pasado luns, cando presentou tras o Consello da Xunta o proxecto da SAIC para xerar 2.300 empregos entre Ferrol e As Pontes, que os terreos que aspira a ocupar o grupo chinés ían “estar libres no momento no que se outorgue a concesión”. Referiuse, ademais, a que só se poden outorgar á compañía asiática aqueles terreos sen ocupación ou con concesións que están en “situación de extinción ou incumprimento” por carecer de actividade.

Amper, tras manifestar a súa disposición a colaborar, asegura que non incurriu en incumprimento algún na súa chegada a Ferrol. As mesmas fontes da compañía sinalan que lles gustaría “deixar claro” que o grupo “non incurriu en ningún incumprimento respecto á súa concesión e proxecto industrial en Ferrol“.

A compañía programou este ano o acto cerimonial de inicio das obras no porto exterior de Ferrol, que ía contar coa presenza do presidente da Xunta, Alfonso Rueda, pero que foi suspendido a última hora. Naqueles momentos xa estaban en marcha as negociacións con SAIC para a súa chegada á Galiza, pois se desenvolveron desde outubro do ano pasado ata a presentación oficial do proxecto do grupo chinés a semana pasada.