O temporal obriga a unha limitación extra no AVE entre Ourense e Santiago e suspende trens rexionais.
Adif reduciu a 160 quilómetros por hora a velocidade dos AVE que circulen entre Ourense e Santiago; a medida aplicarase durante 48 horas como consecuencia das adversas condicións meteorolóxicas.
Imaxe de arquivo dun tren de alta velocidade que conecta Galicia con Madrid.
Comentarios
Novo axuste na alta velocidade galega. Adif impuxo unha limitación temporal de velocidade de 160 quilómetros por hora en toda a liña Ourense-Santiago para os trens de alta velocidade. A medida terá unha duración de unhas 48 horas, segundo a axencia Europa Press, e enmárcase dentro do plan do xestor ferroviario para lidar coas adversas condicións meteorolóxicas que asolan á comunidade nestes últimos días.
O pasado venres, o administrador da infraestrutura baixou a 220 o máximo en 28 quilómetros desta liña, a que rexistrou o accidente do tren Alvia fai 13 anos, tras avisos de maquinistas sobre o estado da vía, por vibracións.
Agora, o temporal forza unha nova limitación na alta velocidade e, ademais, provoca a suspensión dos trens rexionais nese mesmo tramo a consecuencia do temporal de chuvia e vento que azouta á comunidade galega.
Estas decisións enmárcanse nun contexto de debate sobre o estado da rede ferroviaria en España, a raíz do descarrilamento con 45 vítimas mortais en Córdoba e outro con un maquinista falecido en Barcelona. Neste último caso, o sinistro produciuse durante un temporal que provocou un desprendemento de terra.
