• Enel tira a toalla e renuncia a un parque eólico en Pontevedra polos requisitos da Xunta
• A Xunta tumba dous parques eólicos en Pontevedra polo impacto sobre a avifauna e a acumulación de muíños

A multinacional francesa Qair ten os ollos postos en Galicia. A compañía de enerxía renovable presentou en 2024 dous proxectos para erguer parques de eólica mariña fronte ás costas de Lugo e Pontevedra que sumarían, de levarse a cabo, 1.242 megavatios. Agora, o grupo que preside Louis Blanchard lanza unha nova iniciativa, aínda que non offshore senón de eólica terrestre; e non só en Galicia senón nun dobre proxecto repartido entre Lugo e Asturias.

Qair pretende instalar dous parques de 246,40 megavatios cada un, o que conlevaría unha capacidade conxunta de 492,8 megavatios. Estas instalacións hibridaríanse con sistemas de almacenamento con baterías mediante plantas BESS (Battery Energy Storage System) de 13,7 megavatios. Os dous proxectos denomínanse PE Lugo Norte 1 e PE Lugo Norte 2, e teñen as mesmas características en canto á capacidade prevista. A sociedade promotora é Qair Renewable Ibérica, filial española da multinacional francesa con sede en Madrid.

Os proxectos foron presentados ante o Ministerio para a Transición Ecolóxica, que aínda non fixo pública a documentación técnica, máis aló de que os parques, as baterías e a liña de evacuación afectarían a municipios galegos e asturianos.

Os plans de Qair reforzan a aposta en Galicia polo almacenamento enerxético, que estivo protagonizada ata agora fundamentalmente por proxectos de centrais hidroeléctricas de bombeo que están, como case todo, aínda pendentes de materializarse. Nos últimos tempos, con todo, emerxeron novas iniciativas de Naturgy, para hibridar parques eólicos; da británica Field, para instalar unha batería en Mesón do Vento; da alemá Steag, cun proxecto similar en O Rosal; ou de Greenergy, con dúas baterías stand alone de 48,26 megavatios no contorno do encoro de Belesar.

A visita da Xunta

Qair é un produtor de enerxía renovable con activos de eólica, fotovoltaica, hidróxeno e hidroeléctrica, que se marcou o obxectivo de acadar os 3 GW en operación en 2027, o que suporía triplicar a capacidade que tiña en 2024. Os seus proxectos repártense entre Europa, África e Sudamérica. O seu nome empezou a soar en Galicia hai dous anos, cando presentou os parques de eólica mariña Roleira, cunha potencia de 594 megavatios (MW) fronte á costa da provincia de Pontevedra; e Breixo, cunha capacidade de 648 MW fronte ao litoral da provincia de Lugo.

Pouco despois de que trascendesen eses proxectos, cuxa materialización esixiría unha concesión na subasta que debe organizar o Goberno, o director xeral de Planificación Enerxética e Minas, Pablo Fernández Vila, visitou as instalacións do proxecto Eolmed, que desenvolve a propia Qair para instalar tres aeroxeradores de eólica flotante nas costas do sur de Francia. A viaxe de Fernández Vila foi en 2025 e, aparentemente, nada tiña que ver cos plans da multinacional francesa en Galicia senón co interese polas plataformas experimentais flotantes para augas profundas como a que impulsou a propia Xunta en Punta Langosteira.

Visita do director xeral de Planificación Enerxética e Minas, Pablo Fernández Vila, ao proxecto Eolmed de Qair / Xunta

• Shein atrasa a súa saída á bolsa ata setembro e valerá oito veces menos que Inditex
• A hucha de José Arnau tras deixar Pontegadea: sete millóns en activos e unha xubilación de ouro

A intelixencia artificial deixou de ser unha tecnoloxía experimental para converterse nunha nova palanca de transformación da industria da moda. O deseño, a previsión de tendencias, a xestión do inventario ou a loxística son algúns dos ámbitos nos que os grandes grupos téxtiles xa están incorporando estas ferramentas. Inditex, H&M, Mango, Shein e Uniqlo avanzan por camiños diferentes, pero co obxectivo común de converter a IA nunha nova vantaxe competitiva e estender a súa aplicación.

Na xunta xeral de accionistas de Inditex, celebrada o pasado xullo, Marta Ortega, presidenta non executiva da multinacional, sinalaba que “a intelixencia artificial e as novas tecnoloxías abrirán posibilidades novas e transformarán a nosa industria, pero seguimos crendo que o valor está nas persoas, no criterio, a sensibilidade e a empatía”. Pola súa parte, Óscar García Maceiras, CEO da compañía, apuntaba que continuarían sacando “proveito de calquera tecnoloxía á nosa disposición”. “Levamos tempo investindo de maneira sostida na intelixencia artificial, que ten unha aplicación transversal no grupo”.

Inditex leva anos dixitalizando a súa cadea de produción. Moito antes da irrupción da intelixencia artificial xerativa, a compañía xa construíra unha sólida base tecnolóxica sobre a que agora está despregando estas novas ferramentas. Así, por exemplo, en 2018 a compañía comezou a implantación do programa de Identificación por Radiofrecuencia (RFID), un sistema que permite saber en que lugar se atopa cada prenda en cada momento grazas a un código localizador situado na mesma etiqueta da marca.

Ese mesmo ano tamén se implantou o Sistema de Xestión Integrado (SINT), tecnoloxía que permite que os clientes poidan recibir os seus produtos tanto desde o inventario dos puntos de venda físicos como desde o canal en liña e que adquiriu unha especial relevancia co estalido da pandemia. 

En 2019 a multinacional asinou un acordo co Massachusetts Institute of Technology (MIT) para desenvolver liñas conxuntas de investigación enfocadas á análise de datos, a intelixencia artificial e o reciclaxe. En base a el iniciaron un proxecto para incluír un método de busca analítico de artigos comparables na súa páxina web. “Intentar anticipar a recepción comercial dos nosos artigos polos nosos clientes é un exercicio especialmente complexo no caso das novidades, xa que é un tipo de artigo suxeito a unha gran volatilidade e para o que non existen datos históricos de comportamento nos que basear as estimacións”, explicaban entón.

En 2021 puxéronse en marcha o proxecto Indución automática a Sorter, o primeiro piloto da compañía que permite colocar de forma automática as prendas dobradas nos clasificadores de paquetería. Na memoria dese ano explicaban que se trataba dunha “tecnoloxía punteira que identifica e selecciona as prendas que posteriormente serán introducidas no sistema, para o que foi necesario contar con modelos avanzados de intelixencia artificial apoiados na investigación dalgúns dos centros tecnolóxicos máis importantes do mundo”. 

Na memoria anual de 2025 explican que a mediados de decembro do ano anterior entrou en funcionamento Zara Try-on, “un sistema de proba virtual baseado en IA, que permite aos clientes crear un avatar a partir das súas propias fotos e xerar imaxes dese avatar lucindo prendas reais”. Ao peche do exercicio estaba implementado en 43 mercados e acumulaba máis de 7 millóns de sesións. 

No World Summit AI 2025 de Ámsterdam, David Lacalle Castillo, entón Senior Machine Learning Engineer de Inditex, presentou KAIA, a plataforma unificada da compañía para construír produtos baseados en intelixencia artificial a gran escala. Esta ferramenta, segundo apuntou o enxeñeiro nunha publicación de Linkedin, busca “democratizar o acceso a capacidades avanzadas de IA dentro do grupo” e acurtar o camiño entre a investigación e a posta en produción de novas solucións. 

Algúns dos produtos impulsados con KAIA son o motor de busca semántico e visual de Zara, que axuda aos usuarios a descubrir produtos similares mediante texto ou imaxes, ou Pixia, “unha plataforma segura e privada” para os deseñadores da compañía con ferramentas de IA “para a creatividade e a produtividade”. 

Outro dos sistemas empregados pola multinacional é Moya. Segundo avanzaba o pasado xullo o diario Expansión, grazas a el os enxeñeiros “definen que solucións queren desenvolver e os axentes de intelixencia artificial desenvolven o código”. Tamén desenvolveron Inditex.AI, un asistente que centraliza as ferramentas de IA á disposición dos traballadores e entende preguntas formuladas en linguaxe natural, como ocorre con ChatGPT ou Gemini, para ofrecer respostas baseadas na información interna da empresa.

O camiño de H&M

A cadea sueca H&M tamén leva anos incorporando a intelixencia artificial e a análise de datos co obxectivo de axustar mellor a oferta ás necesidades do cliente. “As nosas melloras combinadas baseadas en IA están a contribuír significativamente a reducir os niveis de existencias en relación coas vendas, ao tempo que diminúen a cantidade de mostras físicas que producimos”, explicaba a compañía no seu Informe de Sostibilidade do 2023. Naquel exercicio implementáronse ademais solucións baseadas en IA que permitían “redistribuír produtos a zonas cunha demanda máis específica”. 

A aposta de H&M tamén alcanza a cadea de subministración. No seu informe de resultados de 2025, a compañía aseguraba que a toma de decisións baseada en datos e un maior uso da intelixencia artificial están a mellorar a precisión dos seus procesos e reforzando a súa oferta ao cliente. As melloras introducidas na cadea de subministración e unha maior eficiencia nas compras contribuíron a mellorar a xestión do inventario. De feito, as existencias do grupo reducíronse un 12% durante o exercicio, ata 35.427 millóns de coroas suecas, uns 3.200 millóns de euros ao cambio.

En xullo do ano pasado a compañía anunciou que continuaba explorando a IA xerativa mediante o uso de réplicas dixitais de modelos para as súas campañas. “Esta tecnoloxía ofrece a oportunidade de mellorar a narrativa e atopar novas maneiras de conectar cos nosos clientes, sen deixar de ser fieis á identidade de H&M, centrada no estilo e nas persoas”. 

A tecnoloxía de Mango

Mango tamén leva anos incorporando sistemas de intelixencia artificial a distintos puntos da súa cadea de valor, desde a estratexia de prezos ata a personalización ou a atención ao cliente. En 2018 a compañía comezou a desenvolver sistemas de machine learning; na actualidade conta con máis de quince plataformas aplicadas a diferentes áreas do seu negocio. 

Unha delas é LISA, plataforma interna de IA xerativa conversacional, deseñada para empregados e partners que “mellora desde o desenvolvemento de coleccións ata o servizo de posvenda”, segundo explicaban en 2023. “LISA utiliza diferentes modelos, tanto privados como open source, adestrados para a compañía, a partir dos que o grupo de moda construíu a súa propia plataforma de IA xerativa conversacional en menos de nove meses. A nova plataforma conta cunha interface propia de Mango, similar a ChatGPT, adaptada para atender casos de uso dos seus empregados e partners”. 

Mango tamén utilizou a IA xerativa para crear e presentar as súas coleccións. En 2024 lanzou a súa primeira campaña xerada íntegramente con esta tecnoloxía. O proceso comezou con imaxes reais das prendas a partir das cales se adestrou un modelo para xerar imaxes desas pezas sobre unha modelo. A compañía conta tamén coa plataforma de IA xerativa Inspire, que axuda ao equipo de deseño e produto a “inspirarse vendo diferentes conceptos para poder cocrear estampados, tecidos, prendas, etc”.

Este mesmo ano, Mango avanzou tamén na automatización das súas operacións da man de Theker, unha startup española especializada en robótica e intelixencia artificial. Ambas compañías traballan en proxectos para automatizar procesos no centro de distribución de Mango en Lliçà d’Amunt. Theker forma parte tamén da carteira de empresas emerxentes impulsadas por Inditex a través de Alma Mundi FutuRetail Fund, o fondo creado polo grupo en 2024 cunha dotación de 50 millóns de euros.

Shein e Uniqlo

No caso de Shein, a IA e a análise de datos ocupan un lugar importante nun modelo de negocio que ten a velocidade e a demanda entre os seus principais eixes. A compañía asegura que, en lugar de basearse unicamente nas previsións de tendencias, toma decisións a partir das preferencias e compras dos seus clientes e utiliza tecnoloxía propia para medir en tempo real a demanda. Esa información trasládase directamente aos seus provedores, que comezan con pequenos lotes para medir a súa resposta para avaliar a resposta dos consumidores e repoñer unicamente aqueles produtos que demostran ter demanda. Deste xeito, a tecnoloxía conecta o comportamento do consumidor coas decisións de produción e subministración. 

A compañía monitoriza continuamente a diferenza entre o stock dispoñible e as necesidades previstas dos clientes para determinar cando e que unidades debe volver pedir aos seus provedores. A esta estratexia súmanse os algoritmos de recomendación e personalización da plataforma, que determinan que produtos gañan visibilidade para cada usuario en función das súas buscas, historial de navegación, preferencias, compras anteriores e ubicación. Deste xeito, os clics, os produtos engadidos ao carrito e as compras tamén poden influír na posición que ocupa un artigo dentro da plataforma.

Pola súa parte, Fast Retailing, a matriz de Uniqlo, utiliza modelos de previsión de demanda baseados en algoritmos e analiza as condicións de venda e o feedback de tendas e clientes para axustar os seus plans de vendas a cada referencia. O obxectivo é cruzar os datos que xera o cliente con produción, distribución e as tendas para fabricar as unidades necesarias en cada momento. 

A automatización alcanza tamén os centros loxísticos de Uniqlo, onde Fast Retailing implantou almacéns altamente automatizados, capaces de xestionar procesos como a recepción, clasificación, preparación e inspección das prendas. O grupo comezou a operar en 2018 un almacén completamente automatizado en Ariake (Tokio) e desde entón estendeu esta tecnoloxía a outros mercados, co obxectivo de acelerar a chegada dos produtos ás tendas e aos clientes. A compañía tamén integra algoritmos ao longo da cadea, desde a planificación ata o retail, para conectar os plans de produción, vendas e distribución, asignar o stock dos almacéns e organizar o transporte ás tendas.