A economía galega modera o seu crecemento ao 2,5% ante o frenazo das exportacións

O Instituto Galego de Estatística (IGE) certifica a moderación do crecemento da economía galega. O Produto Interior Bruto (PIB) de Galicia repuntou un 2,5% no segundo trimestre deste ano, segundo os últimos datos que o organismo fixo públicos este venres.

Trátase de cinco décimas por debaixo do crecemento interanual rexistrado no segundo trimestre de 2024, e tres décimas por debaixo do crecemento no primeiro trimestre de 2025. A variación intertrimestral, pola súa banda, foi do 0,5% (0,6% no trimestre anterior).

A demanda interna contribuíu con 2,2 puntos porcentuais ao crecemento interanual, e a aportación da demanda externa foi de 0,3 puntos porcentuais. Por outra banda, no segundo semestre deste 2025, o gasto en consumo final nos fogares aumentou un 1,7% máis que no trimestre anterior; e o gasto das administracións públicas creceu un 1,7%, o mesmo que o trimestre anterior. As exportacións de bens e servizos presentan unha taxa interanual do -1,2%, e as importacións, do -2%.

De acordo aos datos do IGE, o Valor Engadido Bruto (VAB) de todos os grandes sectores de actividade rexistra taxas interanuais positivas. A variación interanual é do 0,1% no sector primario; o VAB da industria crece un 2,4%; o da construción crece un 6,6%; e o sector servizos rexistra unha taxa do 2,7%.

Con respecto ao emprego e a produtividade, os postos de traballo equivalentes a tempo completo rexistraron un incremento interanual do 1,4%, catro décimas superior ao trimestre anterior. As horas traballadas aumentaron un 0,4% no segundo trimestre, en termos interanuais, mentres que se reduciron un 0,1% no trimestre anterior.

A produtividade aparente real por posto de traballo equivalente a tempo completo creceu un 1,1% neste trimestre, mentres que a produtividade por hora traballada tamén creceu, un 2,1%.