A patronal do transporte da Coruña defende o preacordo rexeitado: “Incluía melloras relevantes”

As empresas que forman parte da patronal do sector do transporte de viaxeiros por estrada na Coruña reivindicaron “as mellores” do preacordo que alcanzara con CCOO e UGT e que finalmente foi rexeitado polos traballadores por ampla maioría nunha votación celebrada este mércores.

As organizacións empresariais entenden que “os termos do preacordo deixan de ter validez e non producen efecto ningún”. A parte empresarial considera necesario deixar constancia “de que a proposta sometida a votación incluía melloras relevantes para o conxunto do sector que conseguiron frear os paros”.

Entre outras, citan incrementos salariais do 3,4 % para o ano 2025 con abono de atrasos e 3,4% para o ano 2026 con mecanismo de revisión en caso de que o IPC anual superara ese porcentaxe. Tamén ordenación da xornada, fixando unha anual de 1.800 horas, coa prioridade da xornada continuada, acompañada dun plus económico e dunha maior previsibilidade na comunicación de cadros e descansos.

A iso, suman “melloras en complementos económicos: plus de absentismo (1.000 euros anuais), complementos por traballar en festivos, avances en dereitos sociais, e regulación da desconexión dixital”.

As organizacións asinantes apelan agora á responsabilidade de todas as partes ante un sector estratéxico para a provincia da Coruña e para Galicia, “do que dependen miles de persoas usuarias cada día para acceder ao seu traballo, á educación, á sanidade e aos servizos públicos”.

“A continuidade e calidade do servizo esixen decisións rigorosas e sostibles que compatibilicen a protección do emprego coa viabilidade das empresas e a mobilidade da cidadanía”, afirman despois de que, por outra parte, a CIG avanzase a vontade por esta parte de seguir negociando aínda con prazo ata o luns. De non chegarse a un acordo, seguirían as mobilizacións, precisaron en referencia á folga indefinida, que quedou suspendida.