A Xunta anuncia un fondo para captar novas rutas nos tres aeroportos tras a saída de Ryanair

A Xunta de Galicia anunciou que impulsará a creación dun fondo económico de promoción turística para captar novas rutas nos tres aeroportos, tras a caída derivada da marcha de Ryanair. O conselleiro de Presidencia, Diego Calvo, non especificou o importe final da bolsa, xa que a intención do Goberno galego é que tamén participen tanto Aena, como os concellos e as deputacións. Repartirase de forma igual entre os tres aeródromos e a intención non é pagar ás compañías aéreas, senón realizar patrocinio turístico que atraia visitantes.

Calvo anunciou a proposta da Xunta tras a segunda reunión do Comité de Coordinación Aeroportuaria, que acolleu o Rosalía de Castro de Santiago e da que os participantes saíron satisfeitos polos avances acadados.

O pasado mes de novembro celebrábase a primeira reunión deste Comité de Coordinación, da que derivaron, á súa vez, reunións técnicas en cada un dos aeroportos que se desenvolveron entre os meses de decembro e xaneiro. Estas reunións técnicas foron abordadas en conxunto no encontro deste martes, coa vista posta en “axudar a conseguir novos destinos para Galicia“, dixo Calvo.

Mesma cantidade para cada aeroporto

Partindo da análise de Aena, que realizou un estudo de casos de negocio para novas rutas, a Xunta comprometeuse a “colaborar con todas as institucións” e con Aena na posta en marcha de medidas directas para “conseguir novos destinos nos tres aeroportos”, que permitan reactivar os datos de pasaxeiros, moi afectados nos últimos meses pola marcha de Ryanair.

“O que estamos dispostos é a ter un fondo, unha bolsa, que irá destinada á captación de novos voos ou de novos destinos nos tres aeroportos, coa mesma cantidade para cada aeroporto e a mesma cantidade para cada destino”, dixo Calvo, que vinculou esta achega da Xunta aos 13 millóns de euros que se dedican para a promoción de Galicia en destino.

A achega, non obstante, non irá a “pagar ás compañías aéreas”, senón a fomentar a súa implantación a través de acordos de promoción turística en destino, que permitan facer máis atractiva para as compañías a Comunidade e as tres cidades con aeroporto.

Polo menos dúas novas rutas por aeródromo

A idea base, sen marcar como tal un límite, é a de incorporar polo menos dúas novas rutas desde cada aeródromo. Con todo, a cantidade que tería este fondo —e os destinos concretos— non está determinada, dado que dependerá da achega que a el poidan facer a propia Aena, así como as Deputacións e concellos. Esta cuestión, dixo Calvo, abordarase nunha próxima reunión, que se fixará en unhas semanas.

Aena

Na mesma liña, o director de datos e mercado aeronáutico de Aena, Ignacio Biosca, sinalou que “non se trata tanto de definir unha cantidade necesaria” de diñeiro, senón de apoiar “casos de negocio” que traballou Aena como idóneos para Galicia, aínda que rexeitou desvelar os destinos concretos que se estarían a buscar. “Isto non é un sprint, non é unha carreira de 100 metros, senón que é unha carreira de fondo, e se imos todos xuntos, seguro que conseguimos mellores resultados”, dixo.

Con este fondo, dixo, “complementaríase” a rendibilidade ou interese dunha compañía aérea coas “cantidades que cada institución poida achegar” e, ademais, os incentivos de Aena, coa idea de que “cada un dos aeroportos sexa o máis atractivo posible”.

O director de datos e mercado aeronáutico de Aena asegurou que hai conversas con varias compañías e que “teñen interese en voar a Galicia”. Confían, nas próximas semanas, poderlles plantexar un proxecto coa achega de cada institución e avanzar en novos enlaces.

Aínda que non se marcan por agora obxectivos concretos, Ignacio Biosca falou dalgunhas rutas europeas con “un atractivo indubidable”, como é o caso de Londres, Milán, Roma ou París, aínda que a orientación será “un traballo interno do grupo” en futuros encontros e por agora descártase a especialización dos aeroportos.

Rutas rendibles

O obxectivo que se marcaron os participantes, afondou Diego Calvo, é “facer que, unha vez que se consegue un destino, eses voos sexan rendibles economicamente no tempo“. “Non se trata de que veña única e exclusivamente porque alguén che está a financiar unha parte do custo, senón que sexa rendible”, apuntou Calvo. Para esta rendibilidade, engadiu, apóstase “por unha orientación á promoción”.

Esta promoción, destacou, poderá facerse a través de Turismo de Galicia ou, “se se senten máis cómodos”, cada concello “pode coordinar” as súas labores de promoción. “Dámos facilidades e colaboramos para que todo o mundo se sinta a gusto e poidamos sumar entre todos”, rematou.

“Con todo isto, faise un paquete moito máis atractivo para as compañías aéreas, para establecer un novo destino moito máis atractivo, porque as achegas e os incentivos concéntranse e van estar coordinados”, dixo Diego Calvo, que viu “importante” este paso para “cambiar o paradigma de colaboración”.

Coordinación da Xunta

Ante os medios de comunicación tamén falou a concelleira de Turismo de Santiago, Miriam Louzao, que aplaudiu que a Xunta “por fin decidise dar un paso adiante e asumir que ten que colaborar coa captación de rutas aéreas”.

“Nós levamos moito tempo demandando que este é un traballo que non teñen que facer os concellos que teñen aeroportos, senón que debe facerse un traballo coordinado e que é a Xunta a que ten que coordinar esta cuestión”, dixo Louzao, que instou, non obstante, a esperar para ver “en que vai quedar” o anuncio realizado este martes.

Mentres tanto, o Concello de Santiago, engadiu Louzao, ten “reunións permanentemente coas compañías” para abrir novas rutas de cara á reapertura do Rosalía de Castro tras as obras na súa pista que o manterán pechado unhas semanas. “Agardamos que despois desa reapertura de pista, melloren moitísimo os datos do aeroporto, pero somos ambiciosas, non queremos parar aí”, engadiu a concelleira, que evitou concretar rutas en aras da “confidencialidade” que piden as compañías.