A Xunta pon en alerta outros 13 concellos de Ourense despois de calcinarse máis de 46.000 hectáreas.

A Dirección Xeral de Emerxencias e Interior lanza unha nova rolda de alertas pola onda de incendios. A institución enviou as medidas de protección no marco do ES-Alert aos concellos de Baltar, Os Blancos, Xinzo, Trasmiras, Cualedro, Monterrei, Verín, Laza, Oímbra, Riós, A Gudiña, A Mezquita e Vilardevós.

A iniciativa tómase para garantir a seguridade das persoas nas zonas afectadas en Ourense, onde seguen activos os protocolos de protección á cidadanía (situación 2). A alerta fora enviada previamente aos seguintes municipios: Oímbra, Cualedro, Monterrei, Laza, Verín, Vilardevós, Riós, A Mezquita, A Gudiña, Viana do Bolo, Vilariño de Conso, A Veiga, O Bolo, Manzaneda, Chandrexa de Queixa, Montederramo, Parada de Sil, Castrocaldelas, A Teixeira, San Xoán de Río, Larouco, Petín, A Rúa, Quiroga, Ribas de Sil, O Barco de Valdeorras, Vilamartín, Xinzo, Trasmiras, Baltar, Folgoso do Courel e Rubiá, ademais de Carballeda de Avia, Leiro, Avión e Beade.

Na tarde de hoxe foi aos de Baltar, Os Blancos, Xinzo, Trasmiras, Cualedro, Monterrei, Verín, Laza, Oímbra, Riós, A Gudiña, A Mezquita e Vilardevós. Na mensaxe indícase que se eviten os desprazamentos innecesarios e que se permaneza na vivenda. Tamén que se estás no exterior e non tes onde confinarte debes afastarte dos lugares afectados.

Case 44.000 hectáreas arrasadas

A provincia de Ourense está sendo a máis afectada por unha onda de incendios que obrigou a decretar o nivel 2 de alerta para toda a provincia debido aos incendios, viviu outra dura noite de loita contra as lapas que sumou varios centos de hectáreas calcinadas. Na mañá deste sábado permanecen sen extinguir un total de 14 incendios que arrasaron máis de 46.000 hectáreas, a maior parte en Ourense.

E é que Ourense, tras a unión de dous incendios en Chandrexa de Queixa e despois de unificarse este co rexistrado en Mormentelos, en Vilariño de Conso, ata superar as 16.000 hectáreas, rexistra o que ata agora supón o incendio máis grande da historia de Galicia, de acordo cos rexistros oficiais da Xunta, que poden variar dos cómputos doutras entidades e institucións.

Pero outros grandes lumes avanzan na provincia ourensá e, se non se atallan nas próximas horas, coa dificultade que iso conleva debido á magnitude que adquiriron, poderían superar tamén ao rexistrado en O Courel (Lugo), na onda de incendios de 2022, que era ata agora o segundo da historia de Galicia, con 11.800 hectáreas afectadas.

Nesta nova onda, que o director xeral de Defensa do Monte, Manuel Rodríguez, elevaba á máis grave da historia de Galicia xa na madrugada do xoves ao venres, o lume de Oímbra (A Granxa) xa queimou 10.500 hectáreas, segundo as últimas estimacións.

Ademais, Ourense non é a única provincia afectada polos incendios. Hai tamén no resto de provincias, sendo o de Agolada (O Sexo), en Pontevedra, con 400 hectáreas calcinadas e no que se mantén a situación 2 preventiva pola proximidade das lapas ás casas, o de maior magnitude por agora.