O Foro Económico tende pontes entre o Goberno e as comunidades para unha reforma da financiación autonómica

O Foro Económico de Galicia pon o broche de ouro á súa XV Reunión Anual. O Parador de Muxía acolleu dúas xornadas nas que se abordaron os principais retos e oportunidades que se presentan ante a comunidade.

“Nesta reunión xuntámonos persoas de todo tipo de ideoloxías e procedencias para debater sobre temas de actualidade nun ambiente cordial, algo do que sentirnos orgullosos e que debemos coidar”, defendeu o director do Foro Económico de Galicia, Santiago Lago.

O tamén catedrático de Economía Aplicada da Universidade de Santiago de Compostela (USC) considera que o balance desta nova reunión anual é positivo tanto polos temas abordados como pola calidade na composición das mesas.

Neste sentido, a primeira das dúas que tiveron lugar este venres estivo moderada polo director de Economía Digital Galicia, Julián Rodríguez, e puxo o foco na financiación autonómica. Contou coa presenza do conselleiro de Facenda, Miguel Corgos; Santiago Lago Peñas (Universidade de Santiago de Compostela) e Xoaquín Fernández Leiceaga (Universidade de Santiago de Compostela), moderada polo xornalista Julián Rodríguez.

Nela coincidiu na necesidade de levar a cabo un sistema de financiación autonómica, pero, á súa vez, é necesario un maior consenso entre as comunidades antes de que a proposta definitiva chegue ao Congreso dos Deputados. Neste coloquio tamén se tratou a importancia dos fondos europeos e o cambio climático, coa conclusión de que Galicia debe estar moi atenta a este desafío e formar parte dunha estratexia xeral para facelo fronte.

Para concluír a XV Reunión Anual, o Parador de Muxía acolleu a mesa que levaba por título O bo momento da economía española ante os desafíos globais, con Luiz De Mello (director de estudos de país da OCDE) e Raymond Torres (director de Coyuntura Económica de FUNCAS), presentada por Marta Fernández Currás (conselleira de Ecoener e do Deportivo da Coruña).

Tanto De Mello como Torres falaron das posibles consecuencias do actual conflito bélico e repasaron as causas da boa marcha da economía española, entre as que destacaron o impacto positivo da inmigración en determinados sectores. Entre as principais problemáticas para España, destacou o actual problema da vivenda, que ten repercusións sociais e económicas, e no caso de Galicia incidiu na súa crise demográfica, co reto de gañar poboación se a comunidade autónoma quere manter o crecemento sostible dos últimos anos.