A Xunta recomenda máscaras e limitar as saídas ao exterior pola nube de fume provocada polos incendios.

A Xunta de Galicia lanza as súas recomendacións en materia sanitaria para todos os afectados pola onda de incendios que asola a comunidade. A Consellería de Sanidade informou a través dun comunicado de que o fume xerado nos incendios contén unha mestura de gases e partículas microscópicas (PM2,5 e PM10) que poden causar irritacións nos ollos, nariz, gorxa e pulmóns, ademais de provocar dor de cabeza, dor torácica ou dificultade respiratoria.

É por iso que aconsella limitar as estancias no exterior e utilizar máscaras filtrantes mínimo FFP2, entre as recomendacións orientadas a minimizar os riscos asociados á inhalación do fume ou a cinza.

Aínda que as recomendacións son válidas para toda a poboación, o ente autonómico pide prestar especial atención aos grupos máis vulnerables como son os nenos e nenas, as mulleres embarazadas e as persoas con enfermidades pulmonares, como asma ou EPOC, e enfermidades cardíacas.

O Goberno galego recomenda limitar ao máximo as estancias no exterior e evitar realizar actividade física ao aire libre. De necesitar saír ao exterior, pide facelo sempre con máscaras filtrantes mínimo FFP2, xa que aínda que non evitan o paso dos gases e das partículas de menor tamaño, si retén as partículas máis grandes. Se é posible, empregar gafas para protexer tamén os ollos de irritacións oculares. Dentro da casa, onde recomenda permanecer, aconsella manter o aire interior tan limpo como sexa posible e pechar portas e xanelas.

En caso de dispor de aire acondicionado, recoméndase utilizalo, preferentemente con filtros de alta eficiencia que permitan captar as partículas finas do fume. Se o sistema conta cunha entrada de aire fresco, debe colocarse en modo de recirculación ou pechar o regulador de toma de aire exterior. Unha boa medida para manter limpo o aire da casa é a utilización dun purificador de aire portátil.

En paralelo, Sanidade convida a non utilizar elementos que poden incrementar a contaminación de aires en interiores, como velas, e evitar fumar. Ademais, ao proceder á limpeza das cinzas, a Xunta advirte de que se debe extremar as precaucións. Recomenda o uso de máscara, luvas, roupa de manga longa, pantalóns longos, zapatos e calcetíns para protexer a pel, así como o uso de gafas para protexer os ollos.

En caso de contacto das cinzas, debe lavarse as zonas expostas da pel, ollos ou na boca o antes posible.