AVE Vigo-Oporto: Portugal mantén o 2032 como data e Rueda pide ao Goberno que «cumpran coa súa parte»
O presidente da Xunta considera "moi importante" que as autoridades portuguesas ratifiquen o compromiso coa data para que ningún posible "retraso" da parte lusa sirva para "xustificar" que "non se faga nada" desde o Goberno de España.
Rueda e outros membros do seu Goberno no encontro con Duarte. – DAVID CABEZÓN @ XUNTA
Comentarios
Portugal ratifica o 2032 como data para a conexión de alta velocidade con Galicia, segundo apuntou este mércores o alcalde do Porto, Pedro Duarte. O presidente da Xunta aplaudiu o compromiso do Executivo luso ao tempo que urxiu ao Goberno de España para “axilizar” a parte que lle corresponde.
Alfonso Rueda reuniuse co alcalde do Porto xunto ao conselleiro de Presidencia, Xustiza e Deportes, Diego Calvo, e co conselleiro de Cultura, José López Campos, un encontro que serviu para “intensificar” as relacións no ámbito comercial e turístico, segundo apuntaron ambos mandatarios.
Na súa comparecencia, Rueda agradeceu a Duarte a súa colaboración e facilidade para atopar puntos en común entre dous territorios con vínculos culturais e lingüísticos que manteñen unha “relación estreita de moitos anos”.
O titular do Executivo galego incidiu en que na Eurorrexión Galicia-Norte de Portugal son moitas as persoas “que cruzan diariamente e fan vida nos dous lados”. En concreto, viven uns 6,4 millóns de persoas e hai uns 14.000 traballadores transfronteirizos, ademais dun gran número de empresas en ambos lados da fronteira.
Necesidade de avanzar na alta velocidade
O presidente apostou por “dar máis participación aos territorios” nas cumes que os gobernos de ambos Estados realizan anualmente e por mellorar a mobilidade entre ambos territorios, especialmente as comunicacións ferroviarias, como coa modernización do tren Celta, que tarda agora mesmo unhas dúas horas e media por traxecto, a mellora do material rodante.
Pero sobre todo, incidiu na “necesidade de avanzar na conexión de alta velocidade”, unha infraestrutura que cualificou de prioritaria e estratéxica para Galicia e o Norte de Portugal.
Neste sentido, agradeceu a “manifestación expresa” da vontade do alcalde de continuar progresando na infraestrutura en territorio portugués e afirmou que a Xunta seguirá demandando ao Executivo que dirixe Pedro Sánchez que “cumpran coa súa parte”.
Máis vontade política que en España
Preguntados sobre os compromisos de ambos gobernos en relación coa conexión Lisboa-Madrid, ambos mandatarios incidíron en que a aposta por unha non ten que invalidar a outra. “Ninguén entendería que para facer unha conexión se deixase de facer a outra”, dixo o presidente galego.
Tamén resaltou que o “esforzo” de Portugal é “máis grande” segundo a “lóxica” da distancia, e a pesar diso, engadiu, que a tramitación vai “moi adiantada” que na parte española. “Portugal leva moita vantaxe e demostra moita máis vontade política que o Goberno luso”, sentenciou.
Rueda considerou “moi importante” que, igual que este mércores, as autoridades lusas ratifiquen o compromiso coa data para que, ao seu xuízo, ningún posible “atraso” da parte lusa, sirva para “xustificar” que “non se faga nada” desde o Goberno de España.
Ao tempo, co trasfondo das eleccións xerais que tocarían en 2027, aínda que insistiu en que el desexaría que fosen “cando antes”, advertiu que se o seu xefe de filas e expresidente galego, Alberto Núñez Feijóo, é presidente de España, manterá e mesmo “reforzará” a reclamación, sobre todo porque o actual líder do PP foi máximo mandatario galego e abandeirou esta demanda.
Xacobeo 2027
No encontro tamén abordaron asuntos relacionados co Xacobeo 2027, no que a Xunta xa traballa. Rueda reflexionou acerca de que esta “oportunidade histórica” tamén repercutirá no país veciño, especialmente tendo en conta “o gran crecemento” que rexistra o Camiño Portugués da Costa de forma “sostida e intensa”, cunha alza en 2025 do 20% respecto ao ano anterior.
Así, invitou á cidade do Porto a ser partícipe deste Ano Santo a través de iniciativas en materia de turismo ou cultura, que se poden materializar, por exemplo, a través do novo Clúster transfronteirizo de turismo, no que participan asociacións turísticas da cidade portuguesa.
Co Xacobeo no punto de mira, Rueda puxo o foco no impulso dunha programación cultural conxunta e accións promocionais sobre as que “se empezará a falar” para poder “executalas xa este ano e en 2027”.
