BNG e PSOE critican a política de prevención de incendios da Xunta e piden un “cambio de rumbo”.

BNG e PSOE lamentan a vaga de incendios na comunidade e critican a falta de políticas de prevención da Xunta. A deputada do BNG Ariadna Fernández reclamou á Xunta “unha reflexión profunda” para “cambiar o rumbo” da política de prevención de incendios. “Se non o facemos, seguimos vendo como os erros repítense ano tras ano, vendo como Galicia arde ano tras ano”, asegura.

En rolda de prensa este mércores, a deputada nacionalista deixou claro que “os medios de extinción nunca van ser suficientes sen máis prevención, un monte ordenado e unha xestión forestal adecuada”.

“Agora mesmo vivimos xa unha situación de colapso”, lamenta, polo que chama a “repensar e reformular” o modelo forestal.

Pide ir cara a un modelo forestal e “un rural vivo” que “ponga freo aos lumes”. “A prioridade nestes momentos é que a traxedia termine, e temos que facelo de maneira conxunta, unidos”, di.

Así mesmo, transmitiu a solidariedade do Bloque coas persoas afectadas polos lumes e cara ao persoal que traballa para evitar que a situación vaia a peor.

Abandono do rural

Pola súa parte, o secretario xeral do PSdeG, José Ramón Gómez Besteiro, visitou este mércores diferentes zonas afectadas polos incendios forestais en Ourense, onde lamentou a “vaga de incendios devastadora” e criticou a “ausencia de políticas de prevención e de xestión sostible do territorio”.

Segundo trasladaron os socialistas nunha nota de prensa, o líder do PSdeG desprazouse a Ourense para comprobar sobre o terreo a evolución dos lumes na provincia, onde permanece declarado o nivel 2 de alerta.

Ademais, en varios puntos próximos ás zonas queimadas Besteiro falou con veciños para trasladarlles que os socialistas galegos están “ao lado das persoas afectadas e dos equipos de extinción”, sentindo, dixo, “a súa preocupación”.

Tamén aproveitou para enviar unha mensaxe de ánimo e recoñecemento aos brigadistas que sufriron queimaduras no incendio de Oímbra, aos que desexou unha pronta recuperación, así como a outros compañeiros que resultaron lesionados durante os últimos días mentres participaban nas labores de extinción.

“Cada hectárea que arde é un anaco de nós que se perde”, destacou Besteiro, poñendo en valor a importancia do patrimonio natural e lamentando que as chamas acaben “con montes e biodiversidade que custaron séculos, e tamén con moitos proxectos de futuro”.

Así mesmo, o xefe de filas dos socialistas galegos sinalou que o “abandono do rural e a ausencia de políticas de prevención e xestión sostible do territorio” son algúns dos factores que contribúen a sucesos como estes. “Ese baleiro é o caldo de cultivo para que o lume avance sen freo”, expuxo.

Con todo, defendeu que mentres continúa a vaga de incendios é o momento de “estar ao lado da xente e poñer todos os medios para protexer e coidar a terra”. A partir de aí, reivindicou “un plan de país, transversal e valente”, co que enfrontar “a crise climática e evitar que se volva producir unha traxedia como esta”.