Rueda responde ao BNG e ao PSOE: “Os galegos saben que nunca se van a mover do non”

• Besteiro critica a falta de “rumbo, planificación e proxecto” da Xunta: “Galicia perde tempo con este Goberno”
• Besteiro critica a falta de “rumbo, planificación e proxecto” da Xunta: “Galicia perde tempo con este Goberno”

“Os galegos teñen dúas certezas. A primeira é que vostedes nunca se van a mover do non, por diferentes razóns. Pero a certeza máis importante é que saben que a Xunta e o partido que a sustenta nunca se vai a mover doutro punto: o de cumprir os compromisos e con cada palabra”. Con estas palabras respondía o xefe do Executivo galego, Alfonso Rueda, aos grupos da oposición no seu discurso de peche da primeira sesión do Debate sobre o Estado da Autonomía. 

Alfonso Rueda afeou á oposición unhas intervencións centradas na “crítica”. O presidente da Xunta só salvou o “bo ton” do deputado de Democracia Ourensana (D.O.), Armando Ojea, antes de cargar contra Gómez Besteiro, a quen situou “ao servizo” das directrices que saian de La Moncloa, e contra o BNG. 

Con Ana Pontón foi especialmente duro: “Vostede falaba de estancamento e de que todo lle soa ao mesmo. Estou de acordo, pero cando fala de estancamento e de que todo lle soa ao mesmo, non mire para min, máis ben mire para vostede e eses 25 anos sentada aí”.

Do BNG tamén subliñou que “tamén mira fóra”. “Non son os nacionalistas que pretenden facer ver e queren traer para aquí modelos que separan, dividen, crispan e teñen un historial do que se avergoñan tamén”, esgrimiu, antes de advertir a ambos partidos que a Xunta “non ten ningún pacto con Donald Trump” e si ten “condenado o xenocidio”.

“Pero o Bloque si que ten unha alianza co partido que apoia a banda criminal que matou a decenas de galegos e iso vai perseguilos sempre”, engadiu, en referencia a Bildu e á banda terrorista ETA.

“Nós miramos a Galicia. Miramos o que somos, o que fixemos e o que temos que facer, sobre todo o que queda por rematar”. Ese modelo que segue o Goberno autonómico, subliñou, “é unha Galicia que funciona, que cumpre, que medra con sentido e que suma”. 

Alfonso Rueda apuntou que, ao igual que os galegos, non quere “importar a política tóxica que xa temos noutros lugares e que tardará moito en irse; a política tóxica doutras administracións e outros políticos que só queren sobrevivir”. “Ao contrario, queremos exportar calidade, esa que vostedes ridiculizan por non entender nada. Galicia non vai seguir rutas equivocadas que nos marquen desde fóra. Galicia ten que marcar o camiño”. 

Cumprir os compromisos

No seu discurso, o mandatario galego reivindicou a importancia de cumprir cos compromisos, entre eles, o de aprobar as contas anuais. 

“Non hai que falar de pretextos para non aprobar os orzamentos, eses son para outros e outros que os defenden. Non falamos de tapar escándalos, falamos de xestión. Non falamos de castelos nin de promesas que nunca chegan e se fan repetidamente. Falamos de cousas concretas, de vivenda nas cidades, de propietarios que recollen chaves, de xente que ten oportunidade de ter unha vivenda digna”. 

“Balance, proxecto e iniciativas”

Ao tempo, insistiu en reivindicar a “normalidade” de que se celebre este debate de política xeral e defendeu a súa folla de ruta, lembrando que recibiu o aval nas urnas dos galegos. “Aquí hai balance, aquí hai proxecto, aquí hai iniciativas, e todos os grupos poden opinar sobre elas, aínda que as opinións dos de sempre resulten as de sempre: non”, reprochou.

Rueda asegurou que quere “seguir falando” do “que importa aos galegos, dos seus retos, dificultades, das alegrías do día a día”. “Aquí en Galicia facemos política falando do que é necesario, non de excusas nin de imposicións dos grupos minoritarios”, manifestou, para engadir: “hai que falar do programa que gañou as eleccións”.

Baixa de impostos

Tras defender a súa medida de control de baixas laborais –insistiu en que se hai “un problema que afecta á produtividade” é necesario dar pasos para atallalo–, esgrimiu que en Galicia se fala de “aprobar os orzamentos e non de tapar escándalos”. “Non falamos de subidas de impostos, falamos de baixadas se se pode. E non falamos de divisións que separan, nin de proxectos ideolóxicos, senón dos intereses de Galicia”, engadiu.