Galicia move un negocio con Oriente Medio de 500 millóns: exporta téxtil e alimentos e importa enerxía

Galicia incrementou as súas relacións comerciais con Oriente Medio nos últimos vintecinco anos, multiplicando por tres tanto as importacións como as exportacións, segundo os datos do 2025 publicados polo Instituto Galego de Estatística (IGE). No pasado exercicio, a comunidade galega exportou por un importe de 394,6 millóns de euros e importou por 213,1 millóns, por encima dos 105 e 74 millóns, respectivamente, que se moveron en 2020.

En todo o período, as exportacións sempre estiveron por riba das importacións (superávit), aínda que o seu peso sobre o total de compras e vendas galegas é baixo.

Os bens de consumo dominan as exportacións, ao pasar de 101,3 millóns en 2000 a 241,8 en 2025. Dentro deles, os bens de consumo non alimentarios son a parte principal (textil-confección, outros manufacturados): de 97,4 millóns en 2000 a 190,4 en 2025. Con todo, os alimentarios disparáronse de 3,9 millóns a 51,4 millóns.

Os bens intermedios exportados tamén medraron (de 35,4 millóns a 103,2 millóns), cunha participación case totalmente non enerxética, segundo os datos do IGE. Os bens de capital manteñen un peso menor, pero crecente: de 4,2 millóns no ano 2000 a 49,1 millóns en 2025.

Evolución das importacións

Do lado das importacións, en 2000 as que viñan de Oriente Medio supoñían 73,9 millóns, cun peso alto dos bens intermedios (62,1 millóns), especialmente enerxéticos (45,5 millóns).

En 2025, as importacións ascenderon a 213,1 millóns e seguiron dominadas polos bens intermedios (194,1 millóns), pero a parte enerxética (61 millóns) convive cun volume relevante de bens intermedios non enerxéticos (133,1 millóns).

As importacións de bens de consumo seguen sendo reducidas (15,7 millóns en 2025) e os bens de capital tamén manteñen un peso modesto (3,2 millóns).

Ao nivel enerxético, aínda que o volume importado desde Oriente Medio é menor que o da OPEP como bloque (organización de países produtores de petróleo), presenta un papel sensible no subministro de bens intermedios enerxéticos e na diversificación de orixes.

Evolución do petróleo

Por outra banda, as exportacións galegas á OPEP case se triplicaron de 2020 a 2025, ao pasar de 264,6 millóns en 2020 a 633,6 en 2024 e 703,5 en 2025. Con todo, supoñen só un 2,3% do total (que supera os 31.009 millóns).

Deste xeito, igualmente, Galicia ten unha relación comercial coa OPEP cuantitativamente pequena pero estratexicamente relevante, sobre todo polo lado das importacións enerxéticas. As importacións subiron de 523,3 millóns de euros en 2020 a 940,1 en 2024, para despois baixar a 737,7 millóns de euros en 2025. As do pasado ano da OPEP representan arredor dun 3,4% do total de Galicia.

A maior parte das compras a países da OPEP están ligadas a produtos enerxéticos (petroleo cru, derivados, gas licuado), relacionados co consumo interno (mobilidade, industria) e actividades portuarias e loxísticas.

Negocio por provincias

Por provincias, A Coruña concentra case todo o fluxo importador desde a OPEP: 887,2 millóns en 2024 e 690,4 millóns en 2025, fronte ao resto, moi por debaixo.

Pontevedra é, pola súa banda, a principal provincia exportadora cara á OPEP: arredor de 476 millóns en 2024 e 516 millóns en 2025, máis do 70% das exportacións galegas cara a este bloque.

Lugo e Ourense presentan, mentres tanto, niveis reducidos tanto en exportacións como en importacións, con cifras dun ou dous díxitos de millóns de euros.

A Coruña conta co complexo enerxético-portuario, mentres que o perfil de Pontevedra apunta a sectores exportadores industriais como automoción, bens de equipo e produtos do mar transformados, entre outros.